– Һаумыһығыҙ!
Айнур Фәрғәт улын эш кабинеты янында уҡ бер ханым ҡаршы алды. Директор бүлмәһенең ишеген асты ла уға өндәште:
– Рәхим итегеҙ! Ни йомош?
Ҡатын үҙенең ни сәбәпле килеүен әйтте:
– Улым бығаса башҡа мәктәптә уҡый ине. Әле һеҙгә күсерергә булдыҡ, бында тәртип яҡшы, тиҙәр. Икенсенән, башҡорт телен өйрәнһен ине, тим. Тәүҙәрәк алыҫ тип бирмәгәйнек, хәҙер үҫте инде.

– Улығыҙ башҡортса беләме һуң?
– Былай һөйләшеүен-һөйләшә лә, шыма ғына итеп уҡый-яҙа белмәй.
– Улай булғас, өйҙә лә шөғөлләнергә тура килер, мәктәптә генә башҡортса өйрәтеп булмай…
Ыңғай яуап алған әсә ҡыуанып сығып китте. Был һөйләшеү былтыр уҡыу йылы башында булғайны. Күптән түгел директор теге ҡатынды йәнә осратты.
– Балам гимназияға теләп йөрөй, хәҙер башҡортса һин дә мин һөйләшә, – тип ҡыуанысы менән уртаҡлашты ул.
Ҡалала берҙән-бер башҡорт гимназияһының абруйы үҫә барыуына Айнур Ишемғоловтың ҡыуаныуы йөҙөнә яғылды. Ысынлап та, уҡыу йорто тәртип, өлгәш буйынса башҡа белем усаҡтарына өлгө. Шуға башҡа милләт вәкилдәре лә балаларын бында уҡырға бирергә атлығып тора.
Ҡырмыҫҡалы районының Алайғыр ауылында тыуып үҫкән Айнур Стәрлетамаҡ педагогия академияһының математика факультетын тамамлай. Гимназияға етәкселек итеүҙе 2011 йылда ышанып тапшыралар йәш педагогка.
Уҡыу йортонда “Йыл уҡыусыһы” конкурсын уҙғарыу матур йолаға әүерелгән. Ул балаларҙа белем алыуға, гимназияның йәмәғәт тормошонда әүҙем ҡатнашыуға ҡыҙыҡһыныу тыуҙыра. Шулай уҡ олимпиада, фәнни-ғәмәли конференциялар, конкурс һәм ярыш призерҙарының “Еңеүселәр парады”н үткәреү ҙә үҙ емештәрен бирә. Бүтәндәр ошо ғәжәп байрамда ҡатнашыусыларҙан өлгө ала, уларға тиңләшергә ынтыла.
Уҡыусыларҙың фәнни-тикшеренеү эше – гимназияла белем эстәгән һәләтле балалар менән шөғөлләнеүҙең бер йүнәлеше. Бына тиҫтә йылдан ашыу “Мираҫ” фәнни ойошмаһы эшләп килә. Уға юғары категориялы химия уҡытыусыһы Ә. Ғәҙелшина етәкселек итә.
Йәш директор үҙе йәмәғәт эштәрендә лә әүҙем ҡатнаша. Ҡала башҡорттары ҡоролтайы ағзаһы, милли матбуғатты таратыуҙа ҙур тырышлыҡ һала. Был йәһәттән:
– Ҡала балаларын күберәк башҡортса өйрәтергә кәрәк. Был эштә гәзиттең дә өлөшө ҙур. Шуға ла гимназияла милли матбуғатҡа яҙылыу өлкәһендә ҙур эш алып барабыҙ, – ти Айнур Фәрғәт улы.