V класс уҡыусылары менән Өфөгә сәйәхәт ҡылырға тигән хыялыбыҙ көтмәгәндә тормошҡа ашты: лицей-интернаттың 50 йыллыҡ юбилейы уңайынан “Доплайн” туристик компанияһы экскурсия ойошторҙо.

Беҙҙе милли батырыбыҙ Салауат Юла­ев­тың Ағиҙелдең текә ярында урын­лашҡан мөһабәт һәйкәле ҡаршыланы. Унан йәмле Өфөгә аяҡ баҫ­тыҡ. Бигерәк матур беҙҙең баш ҡала! Ул һаман да күркәмләнә, төҙөк­ләндерелә.
Өфө буйлап сәйәхәт Дуҫлыҡ монументынан башланды. Бында беҙгә ҙур бүләк яһаған “Доплайн” туристик ком­панияһы директоры Гөлниса Аҡбашева менән осрашҡас, юлды Иҫке Өфө буйлап дауам иттек. Экскурсовод Гүзәл һы­лыу беҙҙе тарихи урындар менән та­ныштырҙы, бихисап мауыҡ­тырғыс мәғлүмәт бирҙе. Артабан Салауат Юлаев һәйкәленә табан йүнәлдек. Ба­шын ғорур күтәреп арғымаҡта сабып бар­ған, ҡасандыр тыуған ере, азатлыҡ өсөн көрәшкән милли батырыбыҙ һы­ны­на һоҡланып ҡарап торҙоҡ, фотоға төштөк.
Артабан “Макдональдс”та тамаҡ ял­ғаныҡ. Унда Гөлниса Шамил ҡыҙы ба­ла­ларға волейбол, футбол уйындары өсөн туп, уҡыу әсбаптары, портфель бүләк итте, яҡшы уҡырға, сит телдәр өй­рәнергә кәрәклеге хаҡында әйтте. Унан “Родина” кинотеатрында мажаралы фильм ҡараныҡ. Дим ҡасабаһындағы 112-се Башҡорт кавалерия дивизияһы музейы ла балаларға ифрат оҡшаны.
Көн бик тиҙ үтте. Баш ҡалаға сәйә­хәт­тән рухи көс, күңел көрлөгө алып ҡайт­тыҡ. Шуныһы ҡыҙыҡ: “Доплайн” хеҙ­мәткәрҙәре менән хушлашып, автобуста ҡуҙғалып ҡына киткәйнек, ямғыр яуып ебәрҙе. Әйтерһең дә, Аллаһ Тә­ғәлә беҙгә аҡ юл теләй һәм туристик ком­пания хеҙмәткәрҙәренең изге эшен тәбрикләй ине. Балаларға онотолмаҫ сәйәхәт ойошторған “Доплайн”дың директоры, яҡташыбыҙ Гөлниса Аҡба­ше­ваға, ихлас хеҙмәткәрҙәренә ҙур рәхмәт белдерәбеҙ, эштәрендә уңыш теләйбеҙ.