Һуңғы йылдарҙа Өфө күҙгә күренеп матурая. Баш ҡалала оҙаҡ ҡына булмай торған кешеләр: “Танырлыҡ та түгел”, – тип әйтә икән, был маҡтау һүҙҙәре генә түгел. Күнегелгән урындарҙағы иҫке биналарҙың юҡҡа сығыуы йәки яңылары ҡалҡыуы сәбәпле, ауылдан килгәндәр кәрәкле йүнәлеште таба алмай юғалып та ҡалғылай. Яңыраҡ Өфөлә тағы бер заманса бина – Ә. Вәлиди менән Цюрупа урамдары киҫешкән ерҙә халыҡ-ара кимәлдәге “Шератон” ҡунаҡханаһы – ҡалҡып сыҡты.

Ҡаланың көньяҡ күпере аша үҙәк кварталдарға алып барған һәм автомобиль хәрәкәте бик йәнле булған был урын да үҙгәрә бара: Өфө дәүләт сән­ғәт академияһының театр факультеты менән “Өфөкабель” заводына ремонт эшләнде, буш урын­да “Лукойл” компанияһының яңы бинаһы ҡал­ҡып сыҡ­ты, ә элекке ағас өйҙәр урынында халыҡ-ара класлы ҡунаҡхананың мөһабәт бинаһы тө­ҙө­лөп бө­тө­үе был урам сатын тағы ла күркәмләндереп ебәрҙе.
“Шератон” – Өфөләге биш йондоҙло бер­ҙән-бер отель. Биш йондоҙло, тимәк, иң юға­ры си­фат­лы. Бындай ҡунаҡханаларҙа хеҙ­мәт­ләнде­реү­ҙең бик күп төрө күрһә­телә, уларҙа хатта гольф клубы, вертолет майҙан­сы­ғы, күп бүлмәле апартаменттар була. Әлбиттә, йәшәү хаҡтары ла беҙҙең күҙлектән ҡарағанда иҫ киткес юғары.
Ҡунаҡхананы асыу тантанаһын Башҡорт­ос­тан Республикаһы Хөкүмәте Премьер-минист­ры урынбаҫары Владимир Нагорный баш­лап ебәрҙе. Ул ошо объектты төҙөүҙә власть органдары яғынан ҙур ярҙам күрһә­телеүен, шундай ҙур бинаның тиҙ арала – ике йыл эсен­дә генә – төҙөлөп бөтөүен билдә­ләне. Артабан “Эшлекле Рәсәй” Бөтөн Рәсәй йәмәғәт ойошмаһының рәйес­тәше Андрей Назаров, Өфө ҡала хакимиәте башлығы Ирек Ялалов, Башҡортостан Республикаһы министры Руслан Мирсаяпов сы­ғыш яһаны. Ал таҫманы киҫкән­дән һуң ҡунаҡтар бинаның эске өлөшө менән танышты. Төр­лө ҙурлыҡтағы номерҙар, конференц-залдар, тиҙ йөрөшлө лифттар... Ошондай урындарҙа күреп өйрәнелгән келәмдәр һәм ҙур һауыттарҙағы бейек гөлдәр юҡ. Фәҡәт иркенлек һәм уңайлылыҡ ҡына.
Барлыҡ донъяға билдәле “Шератон” ҡунаҡханалар системаһы үҙ тарихын 1937 йылда АҠШ-тың Спрингфилд ҡалаһында тәүге отелен асып башлап ебәрә. Сит ил компанияларының үҫеше менән дөйөм кимәлдә генә танышҡанда ла шул күҙгә са­лын­май ҡалмай: улар беҙҙәге ҡайһы бер олигархтар кеүек күҙ асып йомғансы байып китмәгән, ә аҡрынлап үҫешкән, ышаныслы система булдырырға тырышҡан, сөнки һәр доллар тир түгеп һәм ҡулланыусылар мәнфәғәтен күҙәтеп яулап алынған. Был ҡунаҡ­ха­налар селтәренә ҡарата ла шуны уҡ әйтергә мөмкин. Әйткән­дәй, “Шератон”дың Өфөләге бинаһы – Европаның иң көн­сы­ғы­шын­да урынлашҡан ошо исемдәге ҡунаҡхана.
Отель идарасыһы Ян Виллем Рунхорстҡа күптән ҡыҙыҡ­һындырған һорауҙарҙы бирмәй булдыра алманым:
– “Шератон” тигән исем нимәне аңлата?
– Бер нәмәне лә аңлатмай, ул матур һүҙ генә, – тине идарасы. – Мәҫәлән, “Мерседес” һүҙенең дә мәғәнәһе юҡ бит, фәҡәт автомобиль маркаһын ғына белдерә.
– Шундай ҡиммәтле отель төҙөгәс, тимәк, һеҙ уның табышлы эшләренә лә ышанаһығыҙ. Бөгөнгө еңел булмаған иҡтисади шарттарҙа был инаныу нимәгә нигеҙләнә?
– Оҙаҡламай Өфөлә ШОС һәм БРИКС илдәренең саммиттары уҙасаҡ, уның һөҙөмтәһендә ҡала донъяла киңерәк билдәлелек аласаҡ һәм эшҡыуарҙар, туристар ағымы ла көсәйәсәк.
Биш йондоҙло был шәп (үтә шәп тип әйтергә лә була) ҡунаҡханала журна­лис­тарҙың йәки башҡа шундай ябай кешеләрҙең йәшәп китеүе икеле. Ләкин Өфөнөң халыҡ-ара кимәлдәге абруйын күтәргән, республика ҡаҙнаһына һа­лым­ды арттырған, башҡа ойош­ма­ларға (мәҫәлән, коммуналь хужа­лыҡ, сауҙа, туҡланыу) заказдар биреп торған һәм яңы эш урындары булдырған ошондай “шератон”дар күберәк кәрәк.