Башҡорт дәүләт университетының журналистика кафедраһы яңыраҡ 25 йыллыҡ юбилейын билдәләне. Ошо ваҡыт эсендә ул талантлы, үҙ эшен һөйгән юғары белемле белгестәрҙе сығарҙы. Уйлап ҡараһаң, БДУ-ны бер ҙә журналис­тика кафедраһыҙ күҙ алдына килтереп булмай, ул – университетыбыҙҙың йөҙөк ҡашы. Башҡорт дәүләт университетының элекке ректоры, техник фәндәр докторы, профессор Рәғиб Ғимаев — беҙҙең уҡыу йорто өсөн күңеле һәм йөрәге менән янып эшләгән шәхестәрҙең береһе. Тап ул ошо кафедраны асыуға күп көс һалған.


– Элек журналистика өлкәһе партия контроле аҫтында булды, — тип хәтирәләргә бирелә Рәғиб Насретдин улы. — Беҙгә яңы белгестәр әҙерләргә тотонор алдынан Үҙәк комитеттан һәм Мәғариф министрлығынан рөхсәт алырға кәрәк ине. Әйтергә кәрәк, был йәһәттән күп тапҡыр кире яуап ҡайтарҙылар. Тик беҙ бирешмәнек, һаман үҙебеҙҙең теләкте уларға еткерергә тырыштыҡ. Иң ҡыҙығы шунда: һөйләшеү ваҡытында гел әйтәләр ине: “Башҡортостанда журналистика кафедраһын асыу нимәгә кәрәк ул? Шул уҡ белгестәрҙе Дондағы Ростов, Мәскәү, Ленинград, Ҡазан университеттары әҙерләй ала... Ана, барһындар шунда уҡырға!” “Улар сит өлкәләрҙә уҡып, туған телен онота һәм шуға ла үҙ телендә матур итеп ижад итә алмай”, — тигән яуап ҡайтара инек беҙ.
Тап шул осорҙа Башҡортостанда яңы гәзит-журналдар барлыҡҡа килде. Бына ошо дәлил дә ҙур аҙым яһарға ярҙам итте. Министрлыҡ риза булды. Беҙ иһә кафедраны ике йүнәлештә асыуҙарын һораныҡ. Йәғни рус һәм башҡорт телле журналистарын әҙерләргә кәрәк ине. Ошо мөмкинлек республика мәҙәниәтен үҫтереүгә бик ҙур үҫеш яһаясағын белә инек. Беҙҙең студенттар өс телдә лә ижад итә тип әйтһәк, бер ҙә яңылыш­маҫбыҙ. Бер нисә йылдан татар бүлеген дә аса алдыҡ.
Эйе, кафедрабыҙҙың офоҡтары йылдан-йыл киңәйә. БДУ-ның башҡорт филологияһы һәм журналистика факультеты деканы Риф Әхмәҙиев уның абруйын арттырыуҙа байтаҡ эш башҡара.
— Кафедраның төп эше — яҡшы белгестәр әҙерләү, — ти Риф Барый улы. — Ул сирек быуат осоронда ошо маҡсатына тоғро ҡала. Элекке ваҡытта, баҫмалар аҙ булғас, журна­листарға эш табыуы ла ҡыйын ине. Студенттарға килгәндә, улар ваҡытты бушҡа уҙғарып йөрөргә тейеш түгел. Киреһенсә, үҙҙәрен профессиональ үҫтереүгә ынтылып торорға кәрәк. Уҡыуҙан тыш, редакциялар менән бәйләнеш булдыр­һындар ине.
Әйтергә кәрәк, журналистика бүлеге үҙ баҫмаһыҙ йәшәй алмай. Шуға ла беҙҙә был­тырҙан алып башҡорт телендә “Ауаз” гәзите сыға башланы. Тап ошонда буласаҡ журналис­тар үҙҙәрен күрһәтә һәм үҫтерә ала. Унан тыш, “На острие пера” һәм “Репост” гәзиттәре сыға. Уларҙың һәр һанында студенттарҙың ижад емеше тупланған.
25 йыл эсендә журналистика кафедраһы үҫеште. Ул күп кенә билдәле шәхестәр тәрбиә­ләне, киләсәктә лә яҡшы белгестәр әҙерләйәсәк.