– Беҙҙең аҡсаны кем ҡайтарыр? Ҡасан ғәҙеллек тантана итер?
Ҡысҡырышҡан тауышҡа бүлмәнән сыҡһам, фойела бер төркөм өлкәндәр Бөтә Рәсәй халыҡ фронтының Башҡортостандағы координаторы, “Берҙәм Рәсәй” партияһы рәйесенең Өфөләге Йәмәғәт ҡабул итеү бүлмәһенең яңы етәксеһе, М. Аҡмулла исемендәге Башҡорт дәүләт педагогия университеты ректоры Раил Әсәҙуллинға ҡыҙып-ҡыҙып үҙәктәренә үткән хәлдәрен кемуҙарҙан аңлатырға тырыша.
Был төркөмдәге кешеләр бер нисә йыл элек киң рекламаланған, юғары проценттар менән арбаған, матур бинаға урынлашҡан кредит-ҡулланыусылар кооперативына үҙҙәренең аҡтыҡ аҡсаһын һалған пайсылар ине. Уларҙы тишек кәмәгә ултыртҡандар. Йөрөп-йөрөп тә аҡсаларын кире ҡайтара алмағас, нәфрәттәре ташып, сараһыҙҙан килгәндәр бында.
– Башҡа урында аңлау, яҡлау тапмағас, кешеләр ғәҙеллек юллап, үҙҙәренең йыйылып киткән проблемаларының ыңғай хәл ителеүенә өмөтләнеп, ахырҙа Йәмәғәт ҡабул итеү бүлмәһенә мөрәжәғәт итә. Шуға күрә һәр кемде түҙемлек менән бүлдермәй тыңлау мөһим, – ти Раил Мирвай улы. – Ә артабан мәсьәләнең айышына төшөнөргә тырышырға һәм мөмкин тиклем ярҙам итергә кәрәк.
Шуныһы насар: алданыусылар һәр ҡалала бар. Белгестәрҙең әйтеүенсә, хәҙер был мәсьәлә бер Башҡортостанда ғына түгел, тотош Рәсәйҙә иң көнүҙәктәрҙең береһе булып тора. Уны дәүләт һәм урындағы власть, төҙөүселәр вәкилдәре һәм, әлбиттә, төҙөлөштә ҡатнашыусы өлөшсөләрҙең үҙҙәре менән берлектә хәл итергә кәрәк. Ошо маҡсатта “Берҙәм Рәсәй”ҙең Төбәк сәйәси советы эргәһендә бына бер нисә йыл инде Аҡса һалыусыларҙың һәм өлөшсөләрҙең хоҡуҡтарын яҡлау буйынса көрсөккә ҡаршы төркөм эшләп килә.
Сираттағы мөрәжәғәт итеүсе: “Өйө бик иҫке, етмәһә, бәләкәй. Һуғыш ветераны ҡатынына торлаҡҡа сертификат алырға ярҙам итегеҙ”, – тип үтенде. “Үҙегеҙҙең һорауығыҙҙы ғаризала аныҡ итеп яҙығыҙ. Беҙ уның буйынса эшләй башларбыҙ”, – тине ҡабул итеүсе.
Был көндө “Берҙәм Рәсәй” партияһы рәйесенең Йәмәғәт ҡабул итеү бүлмәһенә өфөләр генә түгел, башҡа ҡалаларҙан да килделәр. Мәҫәлән, Благовещендан бер нисә кеше үҙҙәре йәшәгән Төньяҡ биҫтәһен электр менән тәьмин итеү мәсьәләһе буйынса мөрәжәғәт итте.
– Һеҙҙең һорауҙы мотлаҡ хәл итергә тырышасаҡбыҙ, кәрәк икән, беҙҙең белгес уны урынға барып өйрәнәсәк, – тине Раил Әсәҙуллин.
Граждандарҙы ҡабул итеү ике сәғәттән ашыу барҙы, тиҫтәләгән кеше мөрәжәғәт итте. Халыҡ менән бындай осрашыуҙар хәҙер аҙна һайын була, был сараға Дәүләт Думаһы һәм Дәүләт Йыйылышы депутаттары ла ҡушылды. Әйткәндәй, Башҡортостанда “Берҙәм Рәсәй”ҙең Йәмәғәт ҡабул итеү бүлмәһе партияның урындағы 62 бүлексәһендә лә бар. Башлыса торлаҡ-коммуналь хужалыҡ, пенсия менән тәьмин итеү, дәүләт власы һәм урындағы үҙидара органдарының эшмәкәрлегенә ҡағылышлы мәсьәләләр буйынса мөрәжәғәт итәләр.