Башҡортостаныбыҙҙа йөрәгендә шиғри ҡуҙ йөрөткәндәрҙең күп булыуына хайран ҡалырлыҡ. “Башҡортостан” гәзите хәбәрселәренә “Әҙәби марафон” менән төрлө төбәктә булырға тура килә, осрашыуҙарға кешеләрҙең теләп килеүе – йән ҡыуанысы. Рухлы халыҡтың киләсәге бар!
Бүздәк районынан да редакцияға бер ҡосаҡ ҡулъяҙма килеп төштө. Бөгөн һеҙҙе, хөрмәтле дуҫтар, уларҙың ижад емештәре менән таныштырабыҙ.

Һөйөнә белеп йәшәһәң...

Тырышып эшләп, хаҡлы ялға
сыҡтым,
Ҡул һуҙманым кеше хаҡына.
Кеше хаҡтарына ҡул һуҙғандар
Тап төшөрә ғәзиз халҡына.

Ал-ял белмәй, көндө төнгә ялғап,
Эй йүгерҙек, эштән йәм табып.
Осон-осҡа ялғап йәшәһәк тә,
Эш яратыу булды ҙур бәхет.

Һөйөнә белдек бик аҙ бәхеткә лә,
Эш һөйгәнде Хоҙай ташламай.
Ҡул-аяғың хәрәкәттә булһа,
Ялҡаулыҡтар беҙгә янамай.

Эш һөйәмен, ғәҙел хеҙмәт менән
Алға ынтылырға йән атам.
Дуҫтарым да минең нәҡ
шундайҙар —
Хеҙмәт һөйгән өсөн яратам.

Бәхет бит ул — берҙәм
дуҫ-иштәрең,
Татыу күршең, яҡын туғандар.
Йәнең ярып бирер ейәндәрең,
Йәшәү ҡәҙерен белгән балалар.

Фәнирә МАНСАПОВА.
Бүздәк ауылы.

Төштәремдә генә ишетәм

Арып ҡайтҡан саҡта йыраҡ юлдан,
Әсәй ҡаршы ала һағынып.
Көс кергәндәй була, йомшаҡ ҡулы
Иңдәремә китһә ҡағылып.

Һинең күңел — иркен дала бит ул,
Һыя унда ҡайғы, шатлыҡтар.
Иркәләнер инем ҡосағыңда,
Бер әйләнеп ҡайтһа ул саҡтар.

Аҙмы йылындым мин ҡуйыныңда,
Һынау елдәрендә өшөһәм.
Хәҙер инде, әсәй, тауышыңды
Төштәремдә генә ишетәм.

Әсәй, һинең һуңғы иҫтәлегең —
Үҙең бәйләп биргән йөн ойоҡ.
Бик йыш ҡына, күңел юҡһынғанда,
Ҡарайым мин уға бойоғоп.

Әсәйҙәргә ауыр һүҙҙәр әйтеп,
Күңелдәрен, берүк, телмәгеҙ.
Ваҡыт таба алмайынса, бик
оҙаҡлап,
Яндарына ҡайтмай йөрөмәгеҙ!

Ғәмилә МӘСӘЛИМОВА.
Сәүәҙебаш ауылы.

Бәйгеләрҙә ауған
ат кеүек

Хөсәйен ағай Ҡудашев иҫтәлегенә.

Була бит шундай кешеләр —
Иҫтән сыҡмайҙар һис тә:
Хөсәйен, Зәкиә, Ғабдулла...
Һанай китһәң — бер тиҫтә.

Күңелдә уйылып ҡалған
Хөсәйен ағай Ҡудашев.
100 йәшен байрам иткәндә,
Өҙөлөп иҫкә төшә ул.

Беҙҙән йыраҡ булған илдә
“Ҡыҙыл паша” уйнала.
Хөсәйен ағай талантына
Сүриә халҡы таң ҡала.

Сабып барған ярһыу атты
Хәтерләтеп ул уйнай.
Кинәт тынлыҡ, ҡараңғылыҡ —
Йөрәк тибеүҙән туҡтай...

Туған халҡың байрам итә,
100 йәшеңде ололай.
Яҡташтарың иҫкә ала,
Бүздәк һине онотмай!

Асия САКАЕВА.
Шланлыкүл ауылы.

Мин яратам

Яратам мин ҡышҡы бурандарҙы,
Ябалаҡлап яуған ҡарҙарҙы,
Ап-аҡ бәҫле ҡупшы ҡайындарҙы,
Ап-аҡ шәлен япҡан талдарҙы.

Мин яратам яҙғы ташҡындарҙы,
Йырғанаҡтар гөрләп аҡҡанды,
Морон төрткән хәтфә үләндәрҙе,
Алмағастар сәскә атҡанды.

Яратам мин йәйге иртәләрҙе,
Ҡоштар йырын үлеп яратам.
Ярһыу хисле мин тәбиғәт ҡыҙы —
Хоҙай мине шулай яратҡан.

Яратам мин көҙҙәр еткәнде,
Игенселәр иген иккәнде,
Ҡулдарымды ҡуйып маңлайыма,
Оҙатырға ҡоштар киткәнде.

Мин яратам таңдар атҡанды,
Яратамын шәфәҡ батҡанды.
Яратамын һыйыр һауырға,
Йүгерә-йүгерә көтөү ҡыуырға.

Мин яратам болон-урмандарҙы,
Уңдырышлы ғәзиз еремде.
Сит ерҙәргә һис тә ҡыҙыҡмайым,
Яратам мин Тыуған илемде!

Суфия ҒИЛӘЖЕВА.

Арыҫлан ауылы.

Тыл батырҙары

Мин бәләкәй тип тормаған,
Көтөү көткән, ураҡ урған.
Бала сағы булмаған,
Уны һуғыш урлаған.

Был быуындың ҡалманы
Михнәтте күрмәгәне.
Эшләп йәшәргә тырышты
Аслыҡтан үлмәгәне.

Илемдең тыл батырҙары
Ҡорос кеүек ныҡ булған.
Улар терәк булғанға,
Фашист илдән ҡыуылған.
Ҡәҙерле тыл батырҙары,
Йәшәгеҙ һеҙ иҫән-һау.
Һеҙҙең алда беҙҙең бурыс —
Илде гөл-баҡса яһау.

Сания ШӘРИПОВА.
Уран ауылы.

Бәхет ниндәй төҫтә?

“Бәхет ниндәй төҫтә була?” –
Тип һораһалар әгәр,
“Мотлаҡ аҡ төҫтә була”, — тип
Яуаплар инем, мәгәр.

Сөнки сабый бала тыуғас,
Төрәләр аҡ йүргәккә.
Ап-аҡ бәхет, тәүфиҡ теләп,
Һалалар сәңгелдәккә.

Аҡ алъяпҡыс, таҫма тағып,
Мәктәпкә оҙаталар.
Уҡып бөткәс, ата-әсә
Аҡ юл теләп ҡалалар.

Аҡ айҙарҙа, аҡ майҙарҙа
Вәғәҙәләр бирешәләр.
Шунан, ап-аҡтан кейенеп,
Ҡышҡа өйләнешәләр.

Ап-аҡ ҡарҙан, көрткә батып,
Елдерә туй аттары.
Аҡтан кейенгән йәштәргә
Һоҡлана ил ҡарттары.

Еңгәләре киленсәкте
Баҫтырып аҡ мендәргә,
Бал-майҙан ауыҙ иттереп,
Ултырталар түрҙәргә.

Шунан башлана йәштәрҙең
Бәхетле тормоштары.
Тормош булғас, була инде
Уның төрлө саҡтары.

Мин дә бәхетле тормоштоң
Үттем бар баҫҡыстарын.
Бәхет өсөн аҡтан башҡа
Бүтән бер төҫ тапманым.

Мәхмүзә ШӘҒӘЛИЕВА.

Ҡаңны-Төркәй ауылы.