Благовещен районында урындағы үҙидара көнөн үткәреү күркәм йолаға әйләнгән. Ул эстафета рәүешендә бара: бер ауыл Советы икенсеһенә тапшыра.

Илебеҙ өсөн еңел булмаған иҡтисади шарттарҙа халыҡ нисек көн күрә? Көр­сөктөң әсе елдәре йонсотмаймы? Бер кемгә лә сер түгел: ауылдағылар район үҙәктәрендә төпләнергә тырыша, унда­ғылар иһә ҡалаларға китә. Сәбәбе – ауылда эш урындарының үтә аҙ булыуы.
Танышымдың Благовещендан Өфөгә, дөрөҫөрәге, Черниковка биҫтә­һенә көн дә йөрөп эшләүен беләм. Беҙ ҡаланан тағы ла алыҫҡараҡ юл тоттоҡ. Бараһы еребеҙ – Благовещен районының Яңы Надеждин ауылы. Был биләмәлә бөгөн хәлдәр нисек? Ауыл исеме дәүләт телдәрендә матур итеп яҙылған, ҡаланы көнләш­терерлек асфальт түшәлгән урамдан еләбеҙ, өйҙәрҙең төҙөклөгө иғтибарҙы йәлеп итте, мәҙәниәт йортон да оҙаҡ эҙләмәнек, сөнки бина әллә ҡайҙан балҡып күренә.
– Киләсәктә урындағы үҙидара органдарына күп вәкәләттәр йөкмә­теләсәк, – тип ауыл Советы хакимиәте башлыҡ­тарының күңеленә дәрт өҫтәне Дәүләт Йыйылышы – Ҡоролтай депутаты Рөстәм Мосабиров. – Халыҡҡа яҡын булыу, кешеләр менән үҙ-ара кәңәшләшеп эш итеү һәр йәһәттән дә уңыш килтерәсәк.
Депутат бынан бер йыл элек, эшлекле комиссия ағзаһы булараҡ, был бинаны ҡарап сығыуы тураһында һөйләне, хәҙер иһә уның танымаҫлыҡ хәлгә етеп яҡшы яҡҡа үҙгәреүенә ҡыуанысын йәшермәне.
Ауыл Советы хакимиәте башлығы Наталья Акимкина билдәләүенсә, Яңы Надеждин, Каменная Поляна, Яңы Бла­го­вещенка, балыҡ питомнигы, Сергеевка, Трошкин, Языков, Седовка ауылдарында егермегә яҡын милләт вәкиле татыу ғүмер кисерә. Орлоҡ­солоҡ буйынса махсуслашҡан “Нива” ауыл хужалығы предприятиеһы күптәрҙе эш урыны менән тәьмин иткән, тимәк, бында йәшәү­селәр социаль йәһәттән яҡланған. Урындағы хакимиәт менән хужалыҡтың хеҙмәт­тәшлек ептәре ныҡлы, пред­прия­тиеның халыҡҡа ярҙамы ҙур. Шуның арҡаһында ауылдың инфра­струк­тураһы яҡшырған. Юлдар һалыныуы, биләмәнең төҙөклөгө, мәктәпте һәм мәҙәниәт йортон ремонтлауҙары һәм башҡа эштәр – шуға асыҡ миҫал. Район үҙәге менән ауылдар араһында автобус маршруты ла асылған. Белем усаҡтары һәм фельдшер-акушерлыҡ пункттары эшләй, ҡайһы бер ауылдарға газ ингән, уңғандар йорттарына һыу торбалары ла һуҙған, шәхси эшҡыуарҙар магазин асҡан, мәсет менән сиркәү бар.
– Борон был урында ҡарурман шаулаған. Төрлө яҡтан йыйылған халыҡ яйлап тамыр йәйгән, – тип тарихҡа ҡыҫҡаса байҡау яһаны Наталья Павловна. – Электән килгән эшһөйәрлек, аныҡ маҡсат менән йәшәү әле лә дауам итә. Малсылыҡ һәм үҫемлекселек – надеждиндарҙың төп шөғөлө. Бөйөк Ватан һуғышында ауыл Советынан 600 самаһы кеше ҡат­нашҡан. Ҡыҙғанысҡа ҡаршы, күбеһенә тыуған яғына әйләнеп ҡайтыу насип булмаған.
Наталья Акимкина, ауыл Советы депутаттары һәм старосталарҙың хеҙмә­тен юғары баһалап, уларҙың һәр ва­ҡытта ла терәк-таяныс булыуын бил­дәләне, артабан да берҙәм эш итә­сәктәрен, ошо ысулдың үҙен аҡлауын ышаныс менән әйтте.
Ҡыҫҡаһы, Яңы Надеждин ауыл Советының киләсәкте хәстәрләп йәшә­үенә шаһит булдыҡ. Бөтә ерҙә лә ошон­дағы ише һәйбәт хәл-торошҡа өлгәшелһә ине! Тәжрибә уртаҡлашыу майҙаны һаналған Яңы Надеждин ауыл Советының бер генә булһа ла ыңғай тәжрибәһен башҡалар өйрәнһә, сара юҡҡа уҙғарылмаған тигән һүҙ.
Рәсми өлөштән һуң сарала ҡатна­шыусылар өсөн бер нисә йүнәлештә экскурсия ойошторолдо. Берәүҙәр “Нива” хужалығы менән яҡындан танышты, икенселәр “түңәрәк өҫтәл”дә фекер алышты. Һуңынан байрам концерты тәҡдим ителде.