Яңыраҡ Красноусол башҡорт гимназия-интернатында “Ғафури уҡыуҙары” республика ғилми-ғәмәли конференцияһы булды. Был уҡыу йорто һәләтле балаларҙы асыҡлап артабан үҫтереүҙе, фәнгә ҡыҙыҡһыныу уятыуҙы, киң ҡарашлы шәхес тәрбиәләүҙе, заман менән бергә атлаған лайыҡлы алмаш әҙерләүҙе төп маҡсат итеп ҡуя. Сарала Өфө, Дәүләкән, Стәрлетамаҡ, Ишембай, Күмертау ҡалаларынан, шулай уҡ ундан ашыу райондан өлгөлө уҡыусылар ҡатнашты.

– Конференция балаларҙың ижа­ди офоҡтарын киңәйтер, яңы идея­ларға этәрер, юғарыраҡ бейеклектәр яулауға маҡсаттар ҡуйыр, – тине тәбрикләү телмә­рендә Красноусол башҡорт гимназия-интернаты директоры Рауил Солтанморатов. – “Бер аҙым алға баҫам да әйләнәмен артыма. Ҡайҙа баҫҡандар икән тип, күҙ һаламын халҡыма” тигән юлдар бар Мәжит Ғафуриҙың шиғырын­да. Бөгөнгө уҡыусылар ҙа киләсәк­тә оло шәхестәр булып, халҡыбыҙ мәнфәғәте менән янып йәшәр тип ышанам.
Ысынлап та, уҡыусыларҙың һә­лә­тен асыҡлау өсөн төрлө йүнә­леш буйынса ижади бәйгеләр ойош­торолғайны. Берәүҙәр баш­ҡорт, урыҫ, инглиз телдәренә маһирлығын күрһәтһә, икенселә­ре тарих һәм иҡтисад, физика һәм математика, педагогика һәм психология буйынса ҡыҙыҡлы док­ладтар менән сығыш яһаны, ә инде тыуған яҡты өйрәнеү менән мауыҡҡандар асыштары хаҡында бәйән итте.
Юғары кластарҙа уҡыған ҡыҙ­ҙар һәм үҫмерҙәр өсөн ойош­торолған “Сая ҡыҙ” һәм “Шоңҡар” бәйгеләре үҙе бер тамашаға әүерелде. Уҡ атыу, гер күтәреү, ҡул көрәше, тиҙлеккә йүгереү ярыш­тарында һәр кем таһыл­лы­ғын һынаны. Бынан тыш, улар йыр-моңға, нәфис һүҙгә оҫта­лы­ғын да күрһәтте. Ярыштар һөҙөм­тәһе буйынса Красноусол башҡорт гимназия-интернаты уҡыу­сылары Алмас Шәйәхмәтов менән Ләйсән Йәғәфәроваға етеүсе булманы.
– Рәми Ғарипов, Мәжит Ғафури уҡыуҙары республикабыҙҙа бер нисә йыл рәттән уңышлы бара, – тине Мәғарифты үҫтереү инсти­тутының һәләтле балалар менән эшләү үҙәге директоры Флорида Фәхретдинова. – Бындай саралар балаларҙың белемен камиллаштырыу, рухын күтәреү өсөн бик кәрәк. Унда ҡатнашҡан уҡыусы бүтәнсә фекерләй башлай, килә­сәккә ҙур хыялдар менән баға. Ә инде Красноусол башҡорт гимназия-интернаты шәхесте үҫтереү йәһәтенән күптәргә өлгө булып тора.
М. Аҡмулла исемендәге БДПУ до­центы, филология фәндәре кандидаты Зәки Әлибаев:
– Балалар менән аралаш­ҡан­дан һуң шуға инандым: улар үҙҙә­рен ошо ерҙең хужаһы итеп тоя, киләсәген аныҡ күҙаллай, шуға кү­рә уҡыусыларҙы дәртлән­дерергә, төрлө олимпиадаларға ылыҡты­рырға кәрәк, – тип белдерҙе.
Башҡортостандың ЮНЕСКО эштәре буйынса комитетының баш белгесе Людмила Богуславская, ҡунаҡтарҙы ҡабул иткән мәғариф усағының ҡаҙаныш­тарын юғары баһалап, гимназияға “ЮНЕСКО клубының дуҫтары” сертификатын тапшырҙы.