­Әҙәм балаһы шулай инде: кеҫәһе саҡ ҡына ҡалыная башланымы, сит илгә сығырға әҙер генә тора. Кемделер мөғжизәле Төркиә йәки серле Мысыр үҙенә ылыҡтыра, икенселәр Европа илдәрен йә Ҡытайҙы күрергә теләй. Ә ниңә Башҡортостанды һайламаҫҡа, ялды үҙебеҙҙә лә матур итеп уҙғарырға була ла инде, тип өндәшке килә. Бөгөнгө ҡатмарлы иҡтисади шарттарҙа күпмелер аҡса янда ҡаласаҡ. Республикабыҙҙа ял урындары күп тә инде, әйҙәгеҙ, рәхим итегеҙ! Мәҫәлән, Дыуан районындағы “Әй” профилакторийы йыл әйләнәһенә эшләй.

Исеме лә юҡҡа ғына шулай һайланмаған: ул йырҙарҙа йырланған Әй йылғаһына һы­йынып ҡына урынлашҡан, тирә-йүне урман менән ҡапланған.
Тышта саф һауа һулап йөрөгән өс әхирәт­тең ҡайһы тарафтан булыуын һораныҡ. Үҙен Любовь тип таныштырғаны Екатеринбургтан икән, Мөслимә апай – Ҡариҙел районынан, ә Сөйөмбикә – Октябрьский ҡалаһы ҡыҙы. Бына шулай уларҙы бәрәкәтле Дыуан ере осраштырған, таныштырған.
Шәфҡәт туташы Лилиә Йосопова белдере­үенсә, “Әй”ҙә ғаиләлеләр бихисап, балаларҙы иҫәпкә алып, өс, дүрт, хатта биш урынлыҡ бүл­мәне һайларға мөмкин. Айырым килеү­се­ләр өсөн дә бер урынлыҡтан алып бишәүгәсә бүлмәләр эшләнгән. Дөйөм алғанда, профилакторий бер юлы 120 кешене ҡабул итерлек. Шул иғтибарға лайыҡ: “люкс”ты һайлаусылар күбәйгәндән-күбәйә. Әйткәндәй, гәзит уҡыусы­ла “Әй”ҙә Башҡорт­остан халҡы ғына ял итә­ме икән тигән һорау тыуыуы ихтимал. Ысын­лап та, күпселекте яҡташтарыбыҙ тәшкил итә, шул уҡ ваҡытта Свердловск, Силәбе, Ырымбур өлкәләренән, Татарстан, Удмурт республикаларынан, Пермь крайынан килгәндәрҙе осратырға мөмкин.
Дауалау курсы үткәндән һуң олоһо ла, ке­сеһе лә ялын үҙенсә күңелле итеп ойош­торорға тырыша, ә уның өсөн һәр яҡлап та шарттар тыуҙырылған. Теннис, шахмат һәм бильярд яратыусылар беренсе ҡаттағы залға ашыға. Ә Финляндиянан һатып алынған тренажерҙа шөғөлләнеү ҡан йөрөшөн көйләй, йөрәк тибешен нормаға еткерә. Массаж яһатыуҙан тәндәр яҙылып ҡала. Киләсәктә әлегә буш торған подвал тулыһынса күңел асыу өсөн үҙгәртеләсәк, хатта бассейн төҙөү ҙә күҙ уңында тотола.
Бал шикелле ҡуйы батҡаҡтың һаулыҡҡа файҙаһы билдәле. Уны Күселәр ауылынан ташыйҙар. Батҡаҡлы мискә эсендә бер ни тиклем ултырһаң, тын алышың еңеләйә, ҡыҫ­ҡаһы, үҙеңде яңынан тыуғандай хис итәһең.
Бынан тыш, Вознесенка ауылына экскурсия ойошторола. Шәхси эшҡыуар нимә менән шөғөлләнәйем тип оҙаҡ баш ватмаған, иҫке йортона музей статусы биргән. Башҡорт­останды мөғжизәләр иле тип юҡҡа ғына әйтмәйҙәр бит – йүнсел төрлө ҙурлыҡтағы фигуралы таштарға картина төшөргән, күргәҙмә ойошторған. Уны ҡарау ғына түгел, иҫтәлек итеп тә алып ҡайталар. Йәнгә дауа, тәнгә сихәт бирерлек тылсымлы шишмә лә бар бында. Һыуын һауыттарға тултырып кемдең күпмегә көсө етһә, шул тиклемде алып ҡайта ала. Чернашар һаҙлығын барып ҡарарға теләүселәр ҙә етерлек.