Быйыл һигеҙенсе тапҡыр ун көн дауамында Яңы йылды кинәнеп байрам иттек. Әммә өлкәндәрҙең “каникулына” мөнәсәбәт бер төрлө генә түгел. Кемдер ялдан ялҡтыҡ тип зарланһа, икенселәр ил гиҙеп, сәфәр йөрөп кинәнә.
Ошо көндәрҙә ил Президентына кандидат Владимир Путин ҡышҡы оҙайлы ялды ҡыҫҡартырға тәҡдим итте. Раштыуа байрамына, 7 ғинуарға тиклем ял итеп, ҡалғанын май айына күсергәндә һәйбәт буласаҡ, тип белдерҙе ул.
Һеҙҙең ошо мәсьәләгә ҡарашығыҙ нисек?

Флүрә БУЛАТОВА, Өфө ҡалаһының “Ашығыс ярҙам” станцияһының ярҙамсы станция мөдире:
— Халыҡта ике төрлө фекер тыуҙырған мәсьәләнең күтәрелеүе һәйбәт. Уҡыу йәшендәге йәки кескәй балалы ата-әсә өсөн ял көндәренең күп булыуы яҡшылыр. Йыш ҡына ошо осорҙа киҙеү тарала, мәктәптәрҙә, балалар баҡсаларында карантин иғлан ителә. Бынан тыш, ғаиләләре менән шифаханаларға һәм ял йорттарына бара алалар.
Икенсе яҡтан ҡарағанда, физик әүҙемлектең кәмеүе һәм туҡтауһыҙ ашап-эсеү сәбәпле, ауырыусылар арта. Айырыуса инфаркт һәм ашҡаҙан-эсәк сирҙәренә бәйле “ашығыс ярҙам” саҡырыу йышая. Май айына күсерһәләр отошло, тип иҫәпләйем. Күптәр тик ятыу менән риза түгел.

Рафаэль ЯНБАРИСОВ, иҡтисад фәндәре кандидаты:
— Ныҡлап уйлап ҡараһаң, ял бөтөнләй кәрәкмәй. Ишетеүемсә, Белоруссияла Яңы йылда бер көн генә байрам итәләр. Хеҙмәтсәндәр өсөн түләнмәгән ялдың һис тә файҙаһы юҡ. Кемгәлер аҡса бик кәрәк, ә ул өйҙә ятырға мәжбүр. Сауҙанан һәм тағы бер нисә өлкәнән башҡа береһе лә ял көндәрендә эшләмәй. Шуға ла илдәге тормош һүнеп, торғонлоҡ хәлендә ҡалғандай тойола.

Нәсимә ШӘМСЕТДИНОВА,хеҙмәт ветераны:
— Ил Премьер-министры Владимир Путиндың ҡышҡы каникулдың бер өлөшөн май айына күсереү тураһындағы тәҡдимен ишеткәс, бик ҡыуандым. Ауыл кешеләре өсөн айырыуса һәйбәт булыр ине. Дөрөҫөн әйткәндә, Яңы йыл байрамының 10 – 11 көнгә һуҙылыуы ялҡыта башлағайны. Ял күп осраҡта өҫтәл артында ултырыуға, телевизор ҡарауға ҡоролоп бара, файҙалы итеп үткәреүселәр аҙ.
Беҙҙең өсөн май айы — иң ҡыҙыу осор. Баҡсала эштәр бихисап, мал-тыуар, ҡош-ҡорт тураһында хәстәрлек күреү артҡан мәл. Мәшәҡәттәрҙе оҙайлы ялға ҡайтҡан балаларыбыҙ һәм туған-тыумасалар ҙа еңеләйтешер ине. Үҙҙәренә лә саф һауала, хәрәкәттә булыу яҡшы, беҙгә лә ҙур ярҙам.

Ғайса ӨМӨТБАЕВ, инженер:
— Байтаҡтан ошо хаҡта һүҙ бара ине. Әле президентлыҡҡа кандидат Владимир Путин тарафынан ошо мәсьәләнең күтәрелеүе яҡшы. Уның тәҡдиме менән килешәм. Айырыуса ауыл халҡы өсөн һәйбәт булыр, тип уйлайым. Ҡала кешеһе, аҡсаһы булһа, ҡыш та, йәй ҙә матур итеп ял итә, теләгән еренә бара ала ул. “Каникул” көндәрен күсереү, минеңсә, ҙур проблема түгел, ә бына эшһеҙлек мәсьәләһен тиҙерәк хәл итһендәр ине.

Илдар ҒӘБИТОВ,иҡтисад фәндәре кандидаты:
— Ҡышҡы “каникулды” ҡыҫҡартыу күптән кәрәк ине. Уны бит демократия заманында түрәләр һәм депутаттар үҙҙәре иркенләп ял итеү, сит илдәргә сәйәхәт ҡылыу өсөн булдырғайны. Ябай халыҡҡа аҡсаһыҙ өйҙә ятыуҙың ҡыҙығы юҡ. Ялҡытты тигән һүҙҙәр нигеҙҙә уларҙан ишетелә.
Иҡтисади йәһәттән ҡарағанда ла ялдың файҙаһы юҡ, сөнки юғалтыуҙар күп. Ә ауылда йәшәүселәр, баҡсалары булыусылар ялдың бер өлөшөнөң май айындағы байрам осорона күсерелеүенә һөйөнәсәк кенә. Тәҡдим ителеүе яҡшы, уны депутаттарҙың хуплауы ла кәрәк бит әле.