Кеше өсөн иң мөһиме — торлаҡ. Унһыҙ лайыҡлы йәшәү ҙә, балалар тәрбиәләү ҙә, эшеңдән, булмышыңдан ҡәнәғәтлек кисереү ҙә ауыр. Бөгөн республикабыҙҙа 70 меңдән ашыу граждандың торлаҡҡа мохтажлығы, яртыһының тип әйтерлек субсидия һәм сертификаттарға хоҡуҡлы булыуы мәсьәләнең ни тиклем көнүҙәклеге һәм ҡырҡыулығы хаҡында һөйләй.
Был хаҡта юғары кимәлдә һөйләшеүҙәр алып барылыуына ҡарамаҫтан, торлаҡ менән тәьмин итеүҙә ырамлы аҙымдар әлегәсә һиҙелмәй. Мәҫәлән, былтыр ни бары 5 667 кеше дәүләт ярҙамынан файҙаланған, йәғни дәүләт граждандар алдындағы йөкләмәһен ни бары 13 процентҡа үтәгән. Төҙөлөштәге бындай хәл Башҡортостан Президентын һис тә ҡәнәғәтләндермәй. Яңыраҡ “Социаль торлаҡ төҙөлөшө фонды” коммерцияға ҡарамаған ойошмаһы менән үткәрелгән кәңәшмәлә республика башлығы “миллионлы” ҡалалар араһында Өфөнөң — иң һуңғы, ә республиканың илдә 60-сы урында барыуын билдәләгәйне.
Был көрсөктән нисек сығырға? Ошо хаҡта Республика йортонда үткән социаль торлаҡ төҙөүҙе ҡырҡа арттырыуға арналған видеоконференцияла байтаҡ эшлекле тәҡдимдәр яңғыраны, проблеманы хәл итеү юлдары билдәләнде.
— Былтыр республикала социаль торлаҡ күләме 30 мең квадрат метр тәшкил итте. Был — ғәфү ителмәҫлек ифрат түбән күрһәткес, — тип билдәләне Башҡортостан Хөкүмәте Премьер-министры Азамат Илембәтов. — Быйыл республика һәм федераль бюджеттарҙан дәүләт ярҙамына мохтаждар өсөн 4,2 миллиард һум аҡса бүленәсәк.
Премьер-министрҙы республикалағы етем балаларҙы торлаҡлы итеү мәсьәләһе лә бик борсой. Былтыр уларҙың 1300-ө фатир менән тәьмин ителергә тейеш булһа ла, ни бары 430-ы ғына хоҡуғынан файҙаланған. Видеоконференцияла ҡатнашыусы вазифалы етәкселәрҙең отчеттары Азамат Фәттәх улын ҡәнәғәтләндермәне. Күпме генә кәңәшмә, ултырыш үткәрмә, әлеге лә баяғы бер балыҡ башы, һылтаныуҙар, аҡланыуҙар, төрлө сәбәп эҙләүҙәр, күрәһең, үҙәккә үткән.
Шулай ҙа был кәңәшмәлә социаль торлаҡ төҙөлөшөн әүҙемләштереү буйынса яңғыраған фекерҙәрҙең аныҡлығы, тос һәм эшлеклелеге “боҙ”ҙоң, ниһайәт, урынынан ҡуҙғаласағына ишаралай. Башҡортостан Хөкүмәте Премьер-министры урынбаҫары, торлаҡ-коммуналь хужалыҡ министры Сергей Афонин белдереүенсә, торлаҡ программаһында ҡатнашыусылар өсөн фатир арзан хаҡҡа төҙөләсәк. Социаль торлаҡ хаҡы ерҙе бушлай биреү һәм инженер-коммуникация селтәрҙәрен республика бюджеты иҫәбенә үткәреү һөҙөмтәһендә кәмейәсәк. “2011–2015 йылдарға Башҡортостанда торлаҡ төҙөлөшөн дәртләндереү” программаһына ярашлы, аҙ ҡатлы йорттар төҙөлөшөн үҫтереүгә һәм инженер селтәрҙәрен үткәреүгә быйыл республика бюджетынан 2,53 миллиард һум аҡса йүнәлтелергә тейеш. “Бөгөн ни бары 23 муниципаль берәмектә генә төҙөлөш эштәрен башларға мөмкин”, — тине Сергей Иванович һәм урындағы хакимиәт етәкселәре алдына 1 мартҡа тиклем тейешле бөтә документтарҙы әҙерләп тапшырыу бурысын ҡуйҙы.