Ҡалала тормош гел генә ҡайнай, күңелле һәм файҙалы ял итеү өсөн һәр саҡ ваҡыт табыла. Ҡыш көнө лә күңел асыу саралары күп. Ә ҡаланан ситтә, ауылда йәшәүселәргә ни эшләргә? Әлбиттә, ауылдағы эш ҡыш көнө лә бөтмәй: мал ҡарарға, һыу ташырға, мунса яғырға тигәндәй... Шулай ҙа йәйге кеүек түгел — теләһәң, буш ваҡыт ҡала. Донъяны ҡышҡы һиллек баҫып алғанда тәбиғәт матурлығына күңелең булғансы һоҡланырға мөмкин. Балалар менән бергә рәхәтләнеп сана шыуып килеү ҙә ҙур ҡәнәғәтлек килтерә. Шулай уҡ саңғы, конькиҙа йөрөү өсөн шарттар күп, киңлек тә етерлек: яҡын-тирәләге урман-баҫыуҙар — һинең ҡарамаҡта.
Ә һунарсылар менән балыҡсылар нисек рәхәтләнгәнен белһәгеҙ икән! Барыһы ла аусы булып бөтә алмаһа ла, ҡармаҡ һалырға яратыусылар бихисап. Бөгөнгө кәңәштәребеҙ — уларға.
Ҡышын да үҙенең мауығыуын ташламаусы балыҡсылар күп. Нисек кенә сәйер тойолмаһын, ҡышын балыҡ тотоу йәйгегә ҡарағанда мауыҡтырғысыраҡ та. Йәйен барып булмаған күп урындарға боҙ өҫтөнән атлап юлланыу бер ауырлыҡ та тыуҙырмай: күңелең тарта икән, күлдең уртаһына уҡ барып ултыр. Ҡышҡы балыҡ тотоу ҡомар ҙа өҫтәй. Сатлама һыуыҡтарҙа ла был шөғөлдән ҡәнәғәтлек алыр өсөн бер нисә ҡағиҙәне иҫтә тотоу ғына кәрәк.
Тәү сиратта ҡармаҡ һалыу урынына иғтибар итергә кәрәк. Ҡорамалдарҙы һәм кейемде дөрөҫ һайлағыҙ. Боҙҙо бик яҡшы итеп тикшереү ҙә кәрәк. Иң яҡшыһы — һыуы яйлап ҡына алмашынып торған быуаларҙа ҡармаҡлау, сөнки унда боҙ ныҡлыраҡ. Һәм, әлбиттә, яҡшы табыш алыу өсөн балыҡтың миҙгелгә ярашлы холоҡ-ҡылыҡтарын өйрәнеү зарур.
Был ябай ғына ҡағиҙәләрҙең һәр береһенә ентекләберәк туҡтап китәйек.
Урын һайлау. Ҡышҡы балыҡ тотоу — бер ни тиклем хәүефле шөғөл, шуға күрә һаҡ булырға кәрәк. Күбекһеҙ ҡараңғы боҙ ныҡлы, ә күбекле аҡһылы яҡшылап ҡатмаған була. Боҙ артыҡ ҡараңғы күренһә лә, ул тирәне урап үтегеҙ, сөнки артыҡ шәп ағым йәки шишмә булыуы ихтимал. Шулай уҡ боҙ өҫтө ҡар менән ҡапланған ерҙә лә балыҡ тоторға урынлашмағыҙ. Тышта һауа температураһы минус 12 градустан да түбәнерәк була икән, өйҙә ҡалыу хәйерлерәк. Беренсенән, өшөйәсәкһегеҙ, икенсенән, балыҡ ҡапмаясаҡ.
Өшөү тигәндән, кейем һайлау ҙа мөһим. Әлбиттә, иң яҡшыһы — йылыраҡ кейенеү. Бында йөн кейем, мамыҡ салбар, тун яҡшы. Аяҡҡа быйма кейеү уңышлы. Һыу үтмәй торған кейем алһағыҙ ҙа була. Хәҙер тән йылыһын һаҡлаусы термокейемдәр ҙә күбәйҙе. Уңайлылыҡ өсөн бирсәткәләрҙең ҙур, урта һәм һуҡ бармаҡтарын ҡырҡып ташлағыҙ. Термоста ҡайнар эсемлек алырға онотмағыҙ. Ултырырға уңайлы булһын өсөн йәшник йәки махсус ултырғыс бик кәрәк. Шулай уҡ үҙегеҙ менән бырау, боҙ ҡырҡыусы балта, эхолот (һыуҙың тәрәнлеген үлсәү ҡорамалы) булыуы мотлаҡ.
Ҡыш көнө балыҡ әүҙем түгел. Йылдың был миҙгелендә уларҙың һирәге генә ҡармаҡҡа эләгә. Сабаҡ, шырт балыҡ, шамбы, табан балыҡ, алабуғаны эләктерергә мөмкин. Ҡышын суртан яҡшыраҡ ҡаба. Балыҡ тотоу өсөн тәрән урындарҙы йәки ҡатмарлы рельефлы ерҙәрҙе һайлағыҙ, сөнки, һыуыҡ еткәс, балыҡ шәп ағымлы урындан ҡаса. Яҡты ваҡытта улар әүҙемерәк эләгә. Балыҡ ямғыр селәүсенен, ҡарышлауыҡты яратып ауыҙ итәсәк.
Йылы кейенгәндә һәм хәүефһеҙлек ҡағиҙәләрен үтәгәндә ҡыш көнө балыҡ тотоу бик яҡшы ял итеү һәм тәмле табыш алыу сараһына әйләнә. Бының менән файҙаланмай ҡалмағыҙ.