Март аҙаҡтарында, “Рәсәй Федерацияһы башҡорттары” дәүләт программаһына ярашлы, бер төркөм уҡыусыларым менән Өфөнө күреп ҡайттыҡ. Сәфәрҙән алған тәьҫораттарҙан әле һаман “айнып” бөтә алмайбыҙ. Шул тиклем оҡшаны! Форсаттан файҙаланып, Ырымбур өлкәһенең Александровка урта мәктәбе коллективы, уҡыусылар, уларҙың ата-әсәләре исеменән экскурсияны ойоштороусыларға — Башҡортостан Хөкүмәте Премьер-министры урынбаҫары Салауат Сәғитовҡа, мәҙәниәт министры Әминә Шафиҡоваға, Халыҡтар дуҫлығы йорто директоры Азат Ибраһимовҡа, Бөтә донъя башҡорттары ҡоролтайының Башҡарма комитеты рәйесе Румил Аҙнабаевҡа, өс көн дауамында беҙҙе ҡурсалап, оҙатып йөрөгән Илнур Юлдашбаевҡа, Карина Тимерғәлиеваға, Виктория Губареваға — сикһеҙ рәхмәтебеҙҙе еткерәбеҙ. Эштәрендә уңыштар, ижади үҫеш, рухи көс теләйбеҙ!
Өс көн “һә” тигәнсе үтте лә китте. Программа шул тиклем ҡыҙыҡлы һәм йөкмәт­келе итеп төҙөлгәйне. Ошо һанаулы ғына көндәр эсендә ҡайҙа ғына булып, кемдәр менән генә осрашманыҡ. Тәүге көндө үк, оҙайлы юлдан булы­уыбыҙға ҡарамаҫтан, арыуҙарыбыҙҙы онотоп Ҡасим Дәүләт­кил­деев исемендәге республика һынлы сәнғәт гимназия-интернатына киттек, шул уҡ көндө М. Ғафури исемендәге Башҡорт дәүләт академия драма театрына — Хөрмәтулла Үтәшевтең спектакль-бенефисына — эләктек. Икенсе көндө беҙҙе тағы ла ҡыҙыҡлыраҡ осрашыуҙар көтә ине. “Таныш булығыҙ — Черниковка!” экскурсия программаһы үҙе генә ни тора. Еңеү паркы, “Ләлә-Тюльпан” мәсете, “Ағас сәнғәте” күргәҙмә-йәрминкәһе, Милли музей... Ә кисен – күҙәтеү тәгәрмәсе. Уҡыусыларым әле булһа һөйләп туймай.
Дөрөҫөн әйткәндә, Өфөлә саҡта тәьҫораттарҙы уртаҡлашырға ваҡыт та булманы. Ҡайтыр көндө милләт­тәштәребеҙ тағы бер бүләк әҙерләгән ине — Башҡорт дәүләт опера һәм балет театрына барып, “Бремен музыканттары” мюзиклын ҡараныҡ.
Урыҫтарҙың “В гостях хорошо, но дома лучше” тигән әйтеме бар. Ә беҙҙең, ысын мәғәнәһендә, ҡайтҡы килмәне. Барыһы өсөн дә ҙур рәхмәт һиңә, Өфө!

Резеда КУЧАРОВА.
Ринат АГИШЕВ:
— Биш сәғәт дауамында юлда арып килһәк тә, Салауат Юлаев һәйкәлен күреү менән күңел күтәрелеп китте. Миңә иң оҡшағаны шулай уҡ Еңеү паркы һәм Хәрби Дан музейы булды.
Валерий ИШБУЛАТОВ:
— Миңә барыһы ла оҡшаны. Шулай ҙа драма һәм опера театрҙарында булыу бигерәк тә күңелгә ятты. Иҫ киткес йылы мөхит.
Карина БАЙТИМЕРОВА:
— Өфө ҡалаһын шул тиклем дә матур тип уйламаған инем. Ҡайҙарҙа ғына булманыҡ. Атай-әсәйемә сувенирҙар ҙа алып ҡайттым. Киләсәктә уҡыуымды Башҡортостанда дауам иткем килә.
Ирина ФЕДОРОВА:
— Экскурсия бик ҡыҙыҡлы һәм фәһемле булды. Өфөнөң тарихи өлөшөндә йөрөп, күп нәмә белдек. Ҡылҡәләм сәнғәте тураһында ла үҙем өсөн күп яңылыҡ астым.
Эльвина ИШБУЛАТОВА:
— Ошоғаса ауылдан шул тиклем дә йыраҡҡа сәфәр сыҡҡаным юҡ ине. Өфө мине илһамландырҙы. Тағы барып күрге килә уны. Етәксебеҙ Резеда Кучароваға, уҡытыусыбыҙ Минзәлә Мостафинаға, ойоштороусыларға ҙур рәхмәт.