Ҡалала Башҡортостандың дәүләт власы, төрлө конфессия, милли берек­мә, йәмәғәт вәкилдәре ҡатнаш­лы­ғын­да “Диндәр аралашыуы һәм милләттәр берҙәмлеге – йәмғиәттәге илһөйәрлек нигеҙе” тигән эшлекле кәңәшмә ойошторолдо. Унда республика Башлығы ҡарамағындағы Дәүләт-дин мөнә­сәбәттәре буйынса совет рәйесе Вячеслав Пятков, республика Башлығы Хакимиәте етәксеһенең эске сәйәсәт буйынса урынбаҫары Максим Михайлов, Дәүләт Йыйылышы – Ҡоролтай депутаты, Бөтә донъя башҡорттары ҡоролтайының Башҡарма комитеты рәйесе Румил Аҙнабаев, Юғары мөфтөй, Рәсәй мосолмандарының Диниә назараты рәйесе Тәлғәт хәҙрәт Тажетдин, Башҡортостан мосолмандарының Диниә назараты рәйесе мөфтөй Нурмөхәмәт хәҙрәт Ниғмәтуллин, Сибай ҡалаһы хакимиәте башлығы Хәлит Сөләймәнов һәм башҡалар ҡатнашты.


– Динебеҙ төрлө булһа ла, маҡ­саттарыбыҙ уртаҡ, ҡылған ғәмәл­дә­ребеҙ изге, – тип башланы сығышын Вячеслав Пятков. – Ҡыҙға­нысҡа ҡар­шы, дин, милләт-ара татыулыҡты үҙ итмәйенсә, бысраҡ идеология тара­тыу­сылар, низағҡа юл һалырға тырышыусылар ҙа юҡ түгел. Халыҡты, айы­рыуса йәштәрҙе ошондай хәүеф­тән ҡурсалау – төп бурысыбыҙ. Был мәсьәләне уртаға һалып һөйләшергә, кәңәшләшергә йыйылғанбыҙ.
Республика Башлығы хакимиәте етәксеһенең эске сәйәсәт буйынса урынбаҫары Максим Михайлов, рухи ҡиммәттәргә һаҡсыл ҡарашҡа саҡы­рып, диндең милләттәр араһында берҙәмлек булдырыуҙа тос өлөшөн билдәләп үтте. Сибай ҡалаһы хаки­миәте башлығы Хәлит Сөләй­мәнов иһә ҡунаҡтарҙы урындағы социаль-иҡтисади тормош менән та­ныштырҙы, дини үҙәктәрҙең эше менән ҡәнәғәт булыуын белдерҙе, шулай уҡ бындағы “һаҡаллы” төҙө­лөшкә әйләнгән мәҙ­рәсә бинаһын тиҙерәк сафҡа индереү кәрәклеген әйтте. Башҡа сығыш яһау­сылар диндең изгелеккә, яҡшылыҡҡа, мәр­хәмәтлеккә саҡырған көс булыуын, үҙ-ара дуҫ, татыу йәшәү мөһимлеген йәнә бер раҫланы. Шулай уҡ радикаль ағымдарға, тыныслыҡты боҙоуға кил­тер­гән алама күренештәргә ҡарата фекерҙәр белдерелде, уларға ҡаршы тороу саралары эҙләнде.
– Милләт-ара сәләмәтлекте ҡаҡ­шат­ҡан сир – нәфрәт. Халҡыбыҙ, айырыуса йәштәр был ауырыуға юлыҡ­маһын өсөн ныҡлы аңлатыу эше алып барыу мөһим, – тине “Башҡорт­остан урыҫтары соборы” төбәк йәмәғәт ойошмаһы рәйесе Виктор Пчелинцев.
Йыйында Башҡортостан прокуро­рының өлкән ярҙамсыһы Нәркис Алмаҡаев, республика Эске эштәр министрлығының экстремизмға ҡаршы үҙәк начальнигы Алик Минәшәров сығыш яһаны. Нәркис Фәдис улы төбәктә һуңғы йылдарҙа ҡылынған енәйәттәргә туҡталды, йәштәрҙең социаль селтәрҙәге ҡотҡо ауына, секталарға эләгеүе хаҡында һөйләне.
– Кешенең диненән, милләтенән мыҫҡыл итеү, экстремистик әҙәбиәт, нацист атрибутикаһы таратыу өсөн дә хөкөм алдында яуап бирергә тура киләсәк, – тине Алик Малик улы үҙ сығышында. – Һәр граждан терроризм һәм экстремизмдың үтә ауыр енәйәт икәнлеген, ҙур һәләкәткә килтергәнен аңларға тейеш.
Дин иһә бер ваҡытта ла яманлыҡҡа, яуызлыҡҡа өйрәтмәй. Ул борон-борондан тыныслыҡҡа, изгелеккә, хаҡ юл­дан барырға әйҙәр юл булған.
Кәңәшмә һуңында Вячеслав Пятков диндарҙарҙың бер төркөмөнә рәхмәт хаттары һәм иҫтәлекле бүләктәр тап­шырҙы.