Силәбе ҡалаһында йәшәгән билдәле башҡорт спортсыһы, “Рәсәйҙең иң көслө кешеһе” Эльбрус Ниғмәтуллин сираттағы донъя рекордын ҡуйҙы — милләттәшебеҙ 700 килограмм ауырлығындағы дөйәне күтәрҙе.

Был осраҡлы хәл түгел: үркәсле хайуан — Силәбенең символы. Вася ҡушаматлы дөйәне Эльбрус Ниғмәтуллин 44 секунд күтәреп торған. Әммә башҡорт батыры бының менән генә сикләнмәгән — дөйә баҫып торған платформаға автомобиль тәгәрмәсен һәм штанганың бер дискын өҫтәргә ҡушҡан. Һәм йәнә шулай 23 секунд!
— Һыуыҡ алдырып, өс көн ауырып ятҡанымды иҫәпкә алмағанда, барыһы ла яҡшы. Әлбиттә, арыттырҙы. Иң мөһиме шул: барыһы ла мин уйлағанса килеп сыҡты. Ошоғаса берәү ҙә дөйә күтәргәне юҡ ине. Өҫтәүенә, был хайуандың ҡалабыҙҙың символы булыуы икеләтә ҡәнәғәтлек өҫтәй, — тине бәһлеүән.
Васяның үҙенә килгәндә иһә был көндә унан да тынысыраҡ хайуан булмағандыр — ҙур ҡәнәғәтлек менән ҡуҡырайып төшкән фотоһүрәттәре Интернетты яулап өлгөргән дә инде.
— Дөйәбеҙ, күҙ теймәһен, бик тыныс. Ул бөгөнгөләй ҙур сараларҙы сабыр ғына үткәрә белә, көсөргәнеш кисермәй. Былтыр, мәҫәлән, Вася Олимпия утын йөрөттө, — ти ғорурлыҡ менән “Буян” ат-спорт клубы директоры Татьяна Семенова.
Әйткәндәй, Вася ла буш ҡалмаған — Силәбе бәһлеүәне уға бер тоҡ кишер бүләк иткән.
— Бындай трюкты Рәсәйҙә берәү ҙә эшләгәне юҡ әле, — ти Эльбрус. — Хатта тағы ла ҙурыраҡ рекордҡа ынтылырға мөмкин, ләкин бөтәһе лә бер юлы түгел. Башҡа спортсыларға ла “ҡаҙаныш яланын” ҡалдырырға кәрәк. Шуныһы: машинаны күтәреү ул тиклем ҡыҙыҡ түгел. Мин үҙенсәлекле сығышты һайлайым.
Хәтерегеҙгә төшөрәбеҙ: Эльбрус Ниғмәтуллин илдең иң көслө кешеһе тип 2006 йылда Мәскәү йылғаһы ярында 186 тонналыҡ теплоходты һөйрәп таныла. Милләттәшебеҙ 2005 йылда стронгмен буйынса донъяның вице-чемпионы, бер нисә тапҡыр “Рәсәйҙең иң көслө кешеһе” титулын, пауэрлифтинг, армрестлинг буйынса Рәсәйҙең спорт мастеры, йәнә дүрт спорт төрө буйынса донъя чемпионы исемен яулай.
Былтыр бәһлеүән Силәбе ҡалаһының М. Горький исемендәге паркында 34 тонна ауырлығындағы “күҙәтеү тәгәрмәсен” әйләндереп, рекорд ҡуйғайны. Эльбрус Ниғмәтуллин үҙен актер булараҡ та һынап ҡараны. Халҡыбыҙҙың милли батыры Салауат Юлаев тураһындағы тарихи-документаль фильмда һәм “Һары аждаһа” телесериалында эпизодта төшә.