Студент саҡты йәшлектең иң ҙур мөғжизәһе тип атаһам, яңылышмамдыр, моғайын. Ошо онотолмаҫ ғүмер баҫҡысы буйлап үрләгән йәштәребеҙҙең йылдан-йыл урта һәм юғары уҡыу йорттарына күпләп инеүе ҡыуаныслы. Әле Күгәрсен районынан 900-ҙән ашыу студент булып, уларҙың 222-һе беренсе курста уҡый. Егет-ҡыҙҙар араһында Мәскәү, Санкт-Петербург, Ырымбур, Екатеринбург, Силәбе, Пермь ҡалаларында белем эстәгәндәр, ғилем артынан хатта Чехияға еткәндәр ҙә бар.

Йыл һайын ҡышҡы ял мәлендә йәштәр өсөн осрашыу үткәреү матур йолаға әүе­релгән. Быйыл да район хакимиәтенең йәштәр эштәре һәм спорт бүлеге тарафынан был сара лайыҡлы атҡарылды.
– Һеҙҙе тыуған ерҙә күреүебеҙгә һәр саҡ шатбыҙ. Студент йылдары – киләсәк тормошҡа нигеҙ һалған яуаплы осор ул.
Район юғары һәм урта белемле бел­гес­тәргә мохтаж, ауыл хужалығы эшсән­дә­ре, юристар, табиптар, уҡытыусылар, мә­ҙә­ни-ағартыу эшен ойоштороусылар кәрәк. Әле арағыҙҙа үрҙә һаналған һө­нәр­ҙәрҙе үҙләштереүселәрҙең байтаҡ булыуын иҫәп­кә алып, белгестәргә ҡытлыҡ тиҙ арала юҡҡа сығыр тип ышанабыҙ, – тине ра­йон хакимиәте башлығының ауыл ху­жа­лығы буйынса урынбаҫары Михаил Чижков.
Уҙған йыл райондың мәғариф өлкә­һе­нә эшкә ете белгес – химия, математика, тарих, инглиз, урыҫ теле уҡытыусылары – ҡайтҡан. Ауыл хужалығы ла өс белгесте – зоотехник, юрист һәм бухгалтерҙы – ҡа­бул иткән. Һуңғы йылдарҙа “Тәүәкән” предприятиеһына уҡыуын тамамлап ҡайт­ҡан 15 кеше эш һәм торлаҡ менән тәьмин ителгән.
Осрашыуҙа студенттар алдында Мо­раҡ үҙәк район дауаханаһының баш та­би­бы Ринат Ибраһимов, “Тәүәкән” ДУАП-ы директоры Ғайса Янбаев сығыш яһаны. Студенттар исеменән һүҙ Гөлназ Алла­ғужинаға бирелде. Уҡыусылар, йәштәр, район мәҙәниәт һарайы артистары тарафынан ҡуйылған концерт иһә уйын-көл­кө­гә бай булды. Был йәһәттән Мораҡ башҡорт гимназияһының “Кипиш” коман­даһы айырыуса әүҙемлек күрһәтте. Ос­ра­шыуҙан һуң студенттарҙың бер төркөмө район үҙәк дауаханаһына, Тәүәкән ауылына экскурсияға юлланһа, спортты үҙ иткәндәр балалар һәм үҫмерҙәр спорт мәктәбенә волейбол, шорт-трек, йөҙөү ярыштарына китте. Кискеһен иһә улар өсөн күңелле дискотека ойошторолдо.
Йылдағыса I курс студенттарына аҡса­лата ярҙам күрһәтелде.