Райондың килеп сығышы хаҡындағы тәүге мәғлүмәттәр сауҙагәр яҙмаларында һаҡланған. Унда ер һатып алған майор Сергей Иглинға үтеп барған ылауҙарға ярҙам күрһәтеү йөкмәтелеүе тураһында ла әйтелгән. Ун йорттан торған Мәләкәс биләмәһенә тәүҙә ире, уның вафатынан һуң, ауыл йылдам үҫешкән осорҙа ҡатыны Елена Иглина етәкселек иткән. XIX быуат башында балта, ҡайыш, көршәк кеүек кәрәк-яраҡ яһау киң таралһа, ХХ быуатҡа ауыл хужалығы, сауҙа, етештереү сәнәғәте үҫешә. Һатыу эшен көйләгән Һамар – Златоуст тимер юлын төҙөү ҙә һәр йүнәлешкә ыңғай йоғонто яһамай ҡалмай.
Өфөнән 20 саҡрым ғына алыҫлыҡта ятҡан Иглин районы борондан иҡтисадты, хужалыҡты үҫтереүҙе, йәшәү кимәлен яҡшыртыуҙы иң мөһим бурыс итеп алып, бөгөн дә заман ҡуйған талап-һынауҙар алдында ҡаушап ҡалмай, киләсәккә ышаныслы ҡарай.

Сит ил кимәленән төшмәйҙәр

Иглин ҡасабаһындағы “Энергетик” заводының ҡапҡаһынан эскә үтеү ме­нән эшмәкәрлектең ниндәй юға­рылыҡта ойошторолғанын абай­лай­­һың: тейешле яҙыу-күр­һәтмәләр, мө­ләйем хеҙмәткәрҙәр, һәр ҡоролманың урынлы һәм бөхтә булыуы хайран ҡалырлыҡ.
Үҙеңде сит илдәге киң танылған компания офисындағылай хис итерһең был ойошма эсендә. Әйткәндәй, 2008 йылдың мартында ойошторолған “Энергетик” заводы иң ябайҙан башлап юғары вольтлыға тиклем электротехник һәм электромонтаж тауарҙар етештерә. Йәғни көнүҙәк тормошта – йортта, эштә – иң кәрәкле булған электр утын хәүефһеҙ тәьмин итеү, үткәреү өсөн ҡулланылған щиттар, кабель кәштәләре, тотҡа һәм йәшниктәр яһа­ла бында. Улар иһә йорт, сәнәғәт биналарын төҙөү һәм реконструкция­лауҙа ла бик ҡулай. Тауарҙың Рәсәй стандарттарына яуап бирерлек, сифатлы булыуына етди иғтибар бүленә, сертификатлау бөгөнгәсә дауам итә. Шуныһы мәртәбәле: бында сығарылған әйберҙәр үҙебеҙҙә лә, сит илдә лә етештерелгәндәр менән комплектлана. Заказдарҙы үтәү ваҡыты ла өс көндән ике аҙнаға тиклем генә һуҙыла.
“Энергетик”тың ныҡлы матди-техник базаһы, 2 мең квадрат метр майҙанлы келәте, етештереү цехы, офисы, ашханаһы бар.
– Коллектив ошо уҡ өлкәлә байтаҡ йылдар хеҙмәт иткән белгестәрҙән тупланған. Һәр кем менән йылы, ихтирамлы мөнәсәбәттәбеҙ, барлыҡ мөмкин­лектәрҙе файҙаланып, артабан да бергә, дәррәү эшләргә ниәтләйбеҙ, – ти завод етәксеһе Рәмил Әхтәриев.

Атанан күргән –
ферма асҡан

Йәштәрҙең ауыл хужалығы, ер эше менән ныҡлап шөғөлләнеүе – хәҙерге заман өсөн мәртәбәле күренеш. Аталы-уллы Барый менән Рөстәм Хәбиб­рахмановтар миҫалында төбәктәге ғаиләләрҙә хеҙмәткә ҡарата ыңғай, намыҫлы ҡараш тәрбиәләнеүе ярылып ята. Күптән түгел һөтсөлөк фермаһын булдырған йәш фермер ололар кәңәшенә ҡолаҡ һалып, эшкә ныҡлап тотонған.
800 гектар ташландыҡ ерҙе ҡур­тымға алып, тулыһынса ҡулланы­лышҡа ебәргәндәр, юғары тоҡомло маллы булыу өсөн грант яуларға ла өлгөргәндәр. Бөгөн 400 баш һыйыр малынан алынған һөттө заманса ҡора­малдар ярҙамында эшкәрттереп, баҙарға сығара Рөстәм Барый улы.
Хеҙмәткә һөйөү атаһынан – байтаҡ йылдар колхоз рәйесе булып эшләгән Барый Хәбибрахмановтан – күскән, күрәһең. Бөгөн дә крәҫтиән (фермер) хужалығында башҡа эшселәргә хәстәрлекле, тәрән фекер-кәңәше менән ярҙам итеп йөрөгән Барый ағайҙы тап итергә була. Ир-азаматтар бының менән генә сикләнмәгән, Иглин ҡасабаһында хужалыҡ кәрәк-ярағы магазинын да асҡан, халыҡты киң ҡулланылған тауар менән тәьмин итә.
– Уңыш еңел генә бирелмәй, һәр тинде урынлы тотонғанда һәм берҙәм булғанда ғына эш ырамлы бара, – ти хужалыҡтың баш бухгалтеры Рафаэль Әхмәтйәнов.