“Башҡортостан” дәүләт телерадиотапшырыуҙар компанияһының генераль директоры вазифаһына билдәле журналист Азамат Сәлихов тәғәйенләнде.

Яңы етәксене хеҙмәт коллективына тәҡдим итеүҙә Бөтә Рәсәй дәүләт телерадиотапшырыуҙар компанияһының генераль директоры урынбаҫары Рифат Сабитов ҡатнашты.
– Беҙҙең предприятиеның Башҡорт­остан филиалы – илдә иң яҡшыларҙың береһе. Бында юғары класлы белгестәр эшләй, “Хәбәрҙәр-Башҡортостан” програм­маһының рейтингы федераль кимәлдәге сығарылыштыҡын да үтеп китә, – тине ул.
Азамат Сәлихов – билдәле башҡорт драма актеры, Башҡортостандың халыҡ артисы Рафаэль Сәлиховтың улы, Салауат ҡалаһында үҫкән. Башҡорт дәүләт универ­сите­тының баш­ҡорт филологияһы һәм журналистика факультетына уҡырға ингәнгә тиклем үк гәзиттәргә яҙышып танылған. Студент сағында иһә тормошон телевидение менән тығыҙ бәйләне, Бөтә Рәсәй дәүләт телера­дио­тапшырыуҙар ком­панияһының Башҡортостан, Удмуртия һәм Ырымбур буйынса үҙ хәбәрсеһе булып тиҫтә ярым самаһы йыл эшләне. Былтыр йәй ут эсендә ҡалған Украинала оҙайлы командировкала булып, Рәсәй халҡына ундағы хәл-ваҡиғалар тураһында ҡыйыу репортаждар әҙерләп тапшырғаны, һөнәри бурысын үтәгәндәге саялығы өсөн Салауат Юлаев ордены менән бүләкләнде.