Әлеге йылдың тәүге яртыһында “Башҡортостан” гәзитен ҡайһы районда күпме алдырыуҙары хаҡында аныҡ мәғлүмәт билдәле булды.

Шуныһы һөйөнөслө: 2014 йылдың икенсе яртыһы менән сағыштырғанда гәзитебеҙҙең тиражы шаҡтай артты. Ҡырмыҫҡалы, Әбйәлил, Ишембай, Архангел, Баймаҡ, Ауырғазы, Белорет, Дүртөйлө, Яңауыл райондары һәм Нефтекама, Сибай ҡалалары “Башҡортостан”ға яҙылыуҙа әүҙемлек күрһәтте. Был район һәм ҡалаларҙың етәкселәренә ҙур рәхмәт белдерәбеҙ.
Шул уҡ ваҡытта ҡайһы бер яҡтарҙа һәл­кәүлек күрһәттеләр. Хатта бәғзе китапханаларҙа республикабыҙҙың төп милли гәзите булған “Башҡортостан”ды ла, башҡа баҫмаларҙы ла күрмәҫһең. Ә туған телендәге матбуғатты һанламаған уҡытыусылар балаларҙы нисек итеп илһөйәрлек рухында тәрбиәләргә йыйына икән? Күп нәмә урындағы етәкселәргә бәйле. Ҡыҙғанысҡа ҡаршы, Бишбүләк, Ҡыйғы, Нуриман, Стәрлебаш, Миәкә, Ҡалтасы, Федоровка, Туймазы, Шаран райондарында “Башҡортостан”ға яҙылыуҙы ойоштороуға иғтибар етеңкерәмәгән.
Хәтерегеҙгә төшөрәбеҙ: 1 февралдән 1 апрелгә саҡлы гәзитебеҙгә ошо йылдың икенсе яртыһы өсөн иҫке хаҡтар буйынса яҙылып ҡалырға мөмкин. Ә апрель башынан гәзит-журнал тағы ҡиммәтләнәсәк. Ашығығыҙ, туғандар! Индекстарҙы онотмағыҙ: 50600 – аҙнаһына дүрт тапҡыр (биш һан бергә) сыға торғаны, 31805 – йома һаны (16 бит). 60740 индексы – ойошмалар өсөн.
Әҙәбиәт йылында матбуғатҡа әүҙемерәк яҙылайыҡ, дуҫтар!