Ҡупшы итеп кейенгән, йөҙөнән нур бөркөлгән ханымды урамда осратҡас, уҡытыусы-ветеран Рәйфә апайҙың кәйефе күтәрелде.
– Әй, туғанҡайым! Ҡайһылай матурланып киткәнһең. Тырышһаң, булдыра алаһың бит.
– Аллаға шөкөр, апай. Бына хәҙер мәсеткә йөрөй башлармын тип торам. Ирем дә эшкә урынлашты...
Шатлығын йәшерә алмай Рәйфә Фирғәли ҡыҙы юлдашының арҡаһынан тупылдатып һөйөп алды. Был йәш ҡатын бынан бер йыл элек “шайтан һыуы” менән мауығып киткәйне. Бөгөн килеп матур итеп донъя көткәненә нисек һөйөнмәҫһең!
Райондың Бала Сытырман ауылында инде биш йыл рәттән ағинәйҙәр клубы уңышлы эшләп ки­лә. Төбәктәге был ойош­ма хеҙмәт ветераны, хаҡ­лы ялдағы педагог Рәйфә Вәлиева тырышлығы ме­нән булдырыла.
– Ҡайһы бер ғаилә­ләр­ҙең тарҡалыуы, йәштәрҙең эскегә бирелеүе беҙҙе хафаға һала ине, – тип һү­ҙен башланы Рәйфә ха­ным. – 2008 йылда 19 ғаи­лә имен булмағандар исем­легенә алынды. Был проб­ле­маларҙы миңә мәк­тәп етәксеһе, район, ауыл Сове­ты депутаты булараҡ та күтәрергә тура килде. Хаҡ­лы ялға сыҡҡас, үҙ тәж­ри­бәмде, халыҡ педа­го­ги­каһына нигеҙләнгән белемемде ошо йүнәлештә ҡул­ланырға булдым.
36 йыллыҡ педагогик стажы бул­ған III дәрәжә Хеҙмәт Даны ордены кавалеры Рәйфә Вәлиеваның тәҡ­димен ауыл халҡы хуплап ҡаршы ала. Шулай итеп, Бала Сытырманда районда беренсе булып ағинәйҙәр клубы ойошторола. Үҙҙәренең үткән ғүмере, намыҫлы хеҙмәте, татыу ғаиләһе менән бик күптәргә өлгө булып, кәңәш бирерҙәй, тәжрибә уртаҡлашырҙай апай һәм инәйҙәр ҡорҙоң төп көсөн тәшкил итә. Фә­һи­мә Вәлишина, Фирҙәүес Дәүләтбир­ҙина, Рәмилә Йәлилова, Бибинур Кәримова, Мәмдүҙә Кинйәбаева, Фә­ниә Мәмбәтҡолова, Фәнүзә Сәли­ше­ва, Мәфрүзә менән Тәслимә Ра­­ҡаевалар кеүек ана шундай абруйлы шәхестәр ауылдаштары өсөн терәк булып тора.
Һәр бер клуб ағзаһына имен булмаған, эсеү менән мауыҡҡан ғаиләләр беркетеп ҡуйылған. Ағи­нәйҙәр ике ай һайын уларҙың тормош-көнкүреш шарттары менән та­ныша, балаларының уҡыуы менән ҡыҙыҡһына, хәленән килгәнсә ярҙам күрһәтә.
– Аллаға шөкөр, йәштәр ололар һүҙенә ҡолаҡ һала, – тип һөйөнә ағинәйҙәр. – Ҡайһы саҡ закон көсө етмәгәндә беҙҙең һүҙ үтә.
Әйткәндәй, ағинәйҙәр хәҙер күп­селек дини сараларҙы яңы ғына асылған мәсеттә уҙғара. Был иман йортон ошо ауылда тыуып үҫкән, хәҙер Нижневартовскиҙа йәшәгән эшҡыуар Заһир Әминев төҙөткән. Шундай иманлы, рухлы замандаш­тарыбыҙҙың булыуына ла һөйөнөп бөтә алмай инәйҙәр.