“Башҡортостан” гәзите респуб­ликабыҙҙа дәүләт статусына эйә башҡорт телен үҫтереү, уның ҡулланылыу даирәһен киңәйтеү йәһәтенән тормошҡа ашырыла килгән дөйөм эшкә үҙ өлөшөн индереүҙе дауам итә. Быйыл бы­ғаса донъя күрә килгән “Телгенәм-бергенәм” махсус битенең исемен көсәйтеп, уны “Тел яҙмышы – ил яҙмышы” тип атарға булдыҡ. Рухи хазинабыҙҙы һаҡлау, үҫтереү, киләсәк быуындарға тулы килеш еткереү бурысы беҙҙән артабан да бергәләп эшләүҙе талап итә. Ошо йәһәттән махсус бит ғалимдар­ҙың, уҡытыусыларҙың, ата-әсә­ләр­ҙең, уҡыусыларҙың, тел яҙ­мы­шына битараф булмаған барса дуҫтары­быҙҙың тәжрибә уртаҡлашыр, фекер алышыр, төрлө мәсьәләне уртаға һалып хәл итер майҙансы­ғына әйләнер, тип ышанабыҙ. Һеҙҙән хаттар көтәбеҙ.
Ҡала шарттарында милли һыҙаттарҙы һаҡлау, балаларҙың күңеленә туған теле­нә һөйөү, ихтирам орлоҡтарын сәсеү, уларҙы халыҡ рухында тәрбиәләү еңел эш түгел. Шулай ҙа был ауырлыҡтар үҙ асы­лыңа, ата-баба аманатына тоғролоҡ, ихтыяр көсө, намыҫ алдында еңелеп ҡала. Арабыҙҙа тап шундай күркәм һыҙаттарға эйә милләттәштәребеҙ бихисап. Рухлы, ғорур, телһөйәр, илһөйәр булыуы, балаларын да ошо юҫыҡта тәрбиәләүе менән улар күптәргә өлгө күрһәтеп, алғы сафта бара.
Йәш быуынды туған теленән яҙҙырмаҫ өсөн ғаиләлә ниндәй тәрбиә алымдары булдырыу мөһим? Ҡала шарттарын милли булмыштан өҫтөн ҡуйырға яраймы? Әлеге глобалләшеү заманында балаға туған телде өйрәнеү зарурлығын нисек аңлатырға? “Ҡала һәм башҡорт балаһы” тигән яңы рубрикала ошо һәм башҡа һорауҙарға яуапты бергәләп эҙләйек, хөрмәтле дуҫтар. Унда тәжрибәле ата-әсәләр йәш ғаиләләргә ҡиммәтле кәңәштәрен бирер, үҙ тәрбиә ысулдары менән уртаҡлашыр тигән ышаныстабыҙ. Милләтебеҙ киләсәген бергәләп үҫтерәйек! Инеш булараҡ, тәүге һүҙ – ҡала шарттарында лайыҡлы балалар тәрбиәләп үҫтергән хөрмәтле ағинәй – яҙыусы, педагог Мәрйәм Бураҡаеваға.



Башҡорт теле
Зәйнәб БИИШЕВА

Моң шишмәһе һандуғастай йырсы ла һин,
Һығылма бил тал сыбыҡтай нәфис тә һин,
Аллы-гөллө гөл-сәскәләй наҙлы ла һин,
Эй, илһамлы, эй, хөрмәтле башҡорт теле!

Күгәреп ятҡан Уралыңдай бай, йомарт һин,
Серле ҡамыш ҡурайыңдай ҡарт, олпат һин,
Күпте күргән сәсәнеңдәй, йор, зирәк һин,
Эй, һөйөклө, эй, ҡәҙерле башҡорт теле!

Диңгеҙҙәргә тиңләмәйем – тәрәнһең һин,
Айға-көнгә тиңләмәйем – гүзәлһең һин,
Ҡаяларға тиңләмәйем – бөйөкһөң һин,
Эй, хикмәтле, мәрхәмәтле башҡорт теле!

Күп быуаттар һин йырланың ҡурай моңон,
Күп быуаттар һин йырланың яугир юлын,
Инде азат. Шат. Йырлайһың еңеү йырын,
Эй, бәхетле, эй, ҡәҙерле башҡорт теле!

Иң тәү миңә һин өйрәттең Ленин һүҙен,
Иң тәү миңә һин күрһәттең дуҫлыҡ юлын,
Минең өсөн һин бит йәшәү, бәхет үҙең,
Мәңге йәшә, эй, һөйөклө башҡорт теле,
Атам теле, әсәм теле – минең телем!