Рәсәйҙә һәм Башҡортостанда иғлан ителгән Әҙәбиәт йылы программаһына ярашлы республиканың мәҙәниәт һәм сәнғәт учреждениеларында ҡыҙыҡлы ваҡиғалар көтөлә.
16 ғинуарҙа Әхмәтзәки Вәлиди исемендәге Милли китапханала «Яныбай Хамматов романдары йондоҙлоғо» тигән виртуаль күргәҙмә уҙғарыла. Ул китап уҡыусыларға «Бөртөкләп йыйыла алтын», “Башҡорттар китте һуғышҡа...” кеүек китаптары аша билдәле булған яҙыусының тыуыуына 90 йыл тулыуға арналған.
5 февралдә китапханала студенттар, юғары уҡыу йорто уҡытыусылары, яҙыусылар, тәнҡитселәр ҡатнашлығында Таңсулпан Ғарипованың «Әҙәбиәттең юғары миссияһы» тигән ижад лабораторияһы үтә.
Милли китапхананың матбуғат хеҙмәтенән хәбәр итеүҙәренсә, бында билдәле әҙиптәрҙең, шул иҫәптән яҙыусыларҙың һәм шағирҙарҙың ижадын киң танытыуға, балалар, үҫмерҙәр һәм йәштәр араһында китап уҡыусыларҙы арттырыуға йүнәлтелгән саралар циклы планлаштырылған. Башҡорт яҙыусылары, шағирҙары һәм ғалимдары Әхмәтзәки Вәлиди, Шәйехзада Бабич, Мәжит Ғафури, Һәҙиә Дәүләтшина, Рәми Ғарипов, Абдулхаҡ Игебаев ижадына арналған күргәҙмәләр һәм осрашыуҙар ойоштороласаҡ.
Дат яҙыусыһы Ханс Кристиан Андерсендың, француз яҙыусыһы Антуан де Сент-Экзюпериҙың, чех яҙыусыһы Карел Чапектың, урыҫ шағирҙары, яҙыусылары һәм телселәре Александр Грибоедов, Антон Чехов, Сергей Есенин, Сергей Ожегов, Александр Твардовскийҙың юбилей даталарын билдәләү ҙә күҙ уңында тотола.