Алтын көҙҙөң бер илаһи мәлендә төбәктә үткән осрашыуҙа Әбйәлил районы ветеринария станцияһы етәксеһе Вәлиәхмәт Әсәҙуллин, “Башҡор­тостан” гәзитен киләһе йылда тотош коллектив менән алдырасаҡ­быҙ, тигәйне. Һүҙҙәрендә торҙолар – хеҙмәткәрҙәр баҫмаға дәррәү яҙылып та ҡуйҙы.

Вәлиәхмәт Сәләхйән улы әйтеүенсә, райондың һәр ауыл биләмәһендә ветеринар участка бар, һәм унда икешәр хеҙмәткәр эшләй. Белгестәр халыҡтың сәлә­мәтлеге, ит һәм башҡа та­уар­ҙың хәүефһеҙлеге ха­ҡын­да хәстәрлек күрә, төбәктә малдың именлеген тәьмин итеү буйынса байтаҡ эш атҡара. Мәҫәлән, йорт хай­уандары араһында йоғош­ло сирҙәрҙе иҫкәртеү, фер­маларҙа санитария тәр­тибе булдырыу, мал һанын иҫәпкә алыу һәм амбулатор карта тултырыу ҙа улар иңендә. Ошо тармаҡ бел­гестәренең үҙ бурысына яуап­лы ҡарауы һөҙөмтә­һендә районда йоғошло сирҙәргә бәйле хәл яҡшы.
Тағы шуныһы ҡыуаныслы: ветеринария хеҙмәткәрҙәре матбуғатҡа яҙылыу кам­па­нияһында әүҙем ҡатнаша, район гәзитен алдырыу ме­нән генә сикләнеп ҡалмай­ҙар, республикала сыҡҡан башҡа баҫмаларға ла ихлас яҙыла.
– Беҙ айырыуса ауыл хужалығына ҡағылышлы мә­ҡә­ләләрҙе көтөп алабыҙ, “Йорт-ҡура” махсус битен даими уҡып барабыҙ. Килә­сәктә “Башҡортостан” менән хеҙмәттәшлегебеҙ нығыныр, унда ветеринария хеҙмәте мәсьәләләре күтәрел­гән­дә­рен дә күрергә насип булыр, тип өмөт итәбеҙ, – ти Вә­лиәх­мәт Әсәҙуллин. Ветеринария хеҙмәтендә оҙаҡ йылдар тырышып һәм ҙур яуаплылыҡ тойоп эш­лә­гән белгестәр байтаҡ. Мә­ҫәлән, Әбделмәмбәт ауы­лы- ­нан Салауат Дауытовты, Ташбулаттан Ғәлимйән Фәт­хул­линды, Сиҙәмдән Хажиә­х­­­мәт Әсәҙуллинды, “Красная Башкирия”нан Хәсән Аҫыл­ғу­жинды һәм Намаҙбай Нәж­­мет­диновты айырыуса маҡтау һүҙҙәре менән телгә алғы килә.