Башҡорт дәүләт университетында иҡтисад һәм философия фәндәре докторы, Рәсәй Президенты ҡарамағындағы Халыҡ хужалығы һәм дәүләт хеҙмәте академияһы профессоры Хәлил Барлыбаевтың 70 йәшлек юбилей кисәһе булды.

Байрамға ғалимдар, дәүләт һәм йәмәғәт эшмәкәрҙәре, аспиранттар, студенттар, шәхестең яҡташтары, туғандары килде. Сараның тәүге өлөшөндә академиктар Н.А. Мәжитов, Ф.С. Фәйзуллин, профессорҙар Б.М. Миркин, Ғ.Ғ. Сәлихов һәм башҡалар ғилми доклад менән сығыш яһаны. Унан юбиляр хөрмәтенә концерт башланды. Данлыҡлы Азат Айытҡоловтың ҡурай моңо, Марсель Ҡотоев менән Юнир Һағынбаевтың матур йырҙары күңелдәргә үтеп инде. Тамашасылар шулай уҡ Башҡорт дәүләт университетының музыка коллективы етәксеһе Эмиль Әмирхановтың, ҡу­рай­сылар ансамбленең сығыштарын көслө алҡышҡа күмде.
Байрамдың икенсе өлөшөндә юбилярға ихлас ҡотлау һүҙҙәре еткерелде. Тәбрикләүселәр араһында республика Президенты Хакимиәте, Бөтә донъя башҡорттары ҡоролтайының Башҡарма комитеты, “Башҡортостан иҡтисады” китабының мөхәрририәт ағзалары, Баймаҡ районы хакимиәте вәкилдәре бар ине. Хәлил Әбүбәкер улына шулай уҡ Ер һәм мөлкәт мөнәсәбәттәре, Урман хужалығы министрлыҡтары, Башҡорт дәүләт университетының иҡтисад теорияһы кафедраһы, БДУ-ның Сибай институты хеҙмәткәрҙәре һәм башҡалар хөрмәт һүҙҙәрен еткерҙе.



РЕДАКЦИЯНАН. Халҡыбыҙҙың арҙаҡлы улы Хәлил Барлыбаев, “Башҡортостан”ды – тыуған төйәккә” акцияһына ҡушылып, яҡташтарына гәзитебеҙҙе 10 дана яҙҙырҙы. Афарин, Ил ағаһы!