Рәсәй халыҡтары телендә һәм сит телдәрҙә “Урал батыр” башҡорт халыҡ эпосын башҡарыусыларҙың һәм йәш сәсәндәрҙең V республика конкурсында 500-гә яҡын кеше ҡатнашты.

ЮНЕСКО эштәре комитетының матбуғат хеҙмәтендә хәбәр итеүҙәренсә, ижади ярышҡа Өфөнән йыраҡ урынлашҡан ҡала һәм район вәкилдәре күпләп килгән. Мәҫәлән, Сибайҙан 20 кешелек делегация ҡатнашҡан. Тап ошо ҡалала киләһе йыл республика сәсәндәр мәктәбен һәм “Урал батыр” үҙәген асыу күҙаллана.
Башҡортостан социаль технологиялар институтында ЮНЕСКО эштәре комитетының фәнни-сығанаҡ үҙәге базаһында уҙғарылған бәйгелә 200-ҙән ашыу йәш сәсән һәм халыҡ ижады әҫәрҙәрен башҡарыусы башҡорт, урыҫ, татар, сыуаш, мари, удмурт, украин, ҡаҙаҡ, азербайжан, инглиз, немец, француз, төрөк, ғәрәп һәм башҡа телдәрҙә эпостан өҙөктәр ятланы.
Өфөнөң 39-сы гимназияһынан V класс уҡыусыһы Әлисә Гәрәева иһә конкурс өсөн ҡытай телен һайлаған.
Сибай гимназия-интернатынан VIII класс уҡыусыһы Йәнбикә Ғәлиәкбәрова, уның яҡташы, 9-сы лицейҙан VII класс уҡыусыһы Гөлиә Солтанова, Күгәрсен районының Мораҡ ауылын­дағы башҡорт гимназияһынан IX класс уҡыу­сыһы Гүзәлиә Мозафарова, Асҡын ауы­лының 2-се урта дөйөм белем биреү мәктәбенән VII класс уҡыусыһы Илүзә Сәмиғуллина, Салауат районының Тирмән ауылындағы урта дөйөм белем биреү мәктә­бенән X класс уҡыусыһы Айҙар Ғәйнетдинов, Бәләбәйҙең 1-се гимна­зия­һынан X класс уҡыусыһы Радмила Шәйәх­мәтова, Башҡорт дәүләт универ­сите­тының Сибай филиалының IV курс студенты Гөлнара Ҡазыханова, Бүздәк ауылының 1-се урта дөйөм белем биреү мәктәбенән X класс уҡыусыһы Гүзәлиә Шафиҡова, Өфө районының Нөрлө ауылындағы урта дөйөм белем биреү мәктәбе уҡыусылары Эльвина Шәймәрҙәнова менән Илназар Хәбибуллин I дәрәжә диплом менән бүләкләнде.
Еңеүселәрҙең тулы исемлеге Башҡортос­тандың ЮНЕСКО эштәре комитеты сайтында урынлаштырылған.