“Берҙәм Рәсәй” партияһы рәйесе Дмитрий Медведевтың төбәк йәмәғәтселекте ҡабул итеү бүлмәһендә Дәүләт Думаһы, Дәүләт Йыйылышы —Ҡоролтай депутаттары, Федерация Советы ағзалары граждандарҙы ҡабул итте. «Берҙәм Рәсәй» сәйәси фирҡәһенең йәмәғәт ҡабул итеү бүлмәһе етәксеһе Раил Әсәҙуллин әйтеүенсә, бындай осрашыуҙар халыҡтың тын алышын тойоу, ғөмүмән, уларҙы борсоған мәсьәләләргә асыҡлыҡ индереү һәм хәл итеү өсөн бик кәрәк.

— Кешеләр беҙгә тәҡдимдәр, йыш ҡына хатта ялыуҙар менән мөрәжәғәт итә. Йәмәғәт ҡабул итеү бүлмәһенең ишеге һәр кемгә асыҡ. Законға ярашлы мөрәжәғәттәрҙең береһе лә яуапһыҙ ҡалмай: һәр мәсьәлә ентекле өйрәнелә, тикшерелә, кәрәк тип табылһа, башҡа инстанциялар менән бәйләнеш булдырыла, — ти Раил Мирвай улы.
Рәйес Исмәғилев, мәҫәлән, Октябрьский ҡалаһынан килгән. Ҡалалағы 4-се башҡорт гимназияһының ябылыу сигендә ҡалыуын ул Федерация Советы ағзаһы Лилиә Ғүмәроваға әсенеп һөйләне.
— Заманында тыуым юҡлыҡҡа һылтанып, балалар баҡсаларын ябып бөткәйнеләр. Хәҙер килеп сабыйҙарҙы ҡайҙа урынлаштырырға белмәй баш ватабыҙ. Бөгөн шул уҡ хаталарҙы ҡабатларға йыйынабыҙ түгелме ни? Гимназиябыҙға ябылыу янай. Беҙҙең, атай-әсәйҙәрҙең, һорауҙарын, теләк-тәҡдимдәрен ишетеүсе лә, тыңлаусы ла юҡ, — тине ул.
Лилиә Салауат ҡыҙы мәсьәләне күҙәтеү аҫтына алырға, министрлыҡ, район хакимиәте менән ошо көндәрҙә үк бәйләнешкә сығырға вәғәҙә бирҙе.
Борай районынан Жанетта Дәүләтханованы торлаҡ мәсьәләһе борсой. Күп балалы ғаилә әле авария хәлендәге йортта йәшәргә мәжбүр. Дөйөм майҙаны — 16 квадрат метр. Иң оло балалары – студент, Өфөлә уҡып йөрөй. Ғаиләнең 50 гектар ере лә бар, әммә йорт төҙөп инеү хәлдәренән килмәй. Лилиә Салауат ҡыҙы мәсьәләгә асыҡлыҡ индереү маҡсатынан шунда уҡ бер нисә ведомствоға шылтыратты. Әйткәндәй, һөйләшеү барышында ғаиләлә бер инвалид бала тәрбиәләнеүе лә асыҡланды. Лилиә Ғүмәрова сабыйға тикшереү үткәреү, дауалау тәғәйенләү мәсьәләһен шунда уҡ хәл итте — оҙаҡламай Жанетта балаһы менән Өфөгә дауалау курсына киләсәк.
Ошо уҡ көндө граждандарҙы Дәүләт Думаһы депутаты Сәлиә Мырҙабаева ла ҡабул итте. Уға һаулыҡ һаҡлау, торлаҡ мәсьәләләренә ҡағылышлы һорауҙар менән килгәйнеләр. Күптәрҙең проблемаһы урында уҡ хәл ителде.
Ғөмүмән, “Берҙәм Рәсәй” партияһы рәйесе Дмитрий Медведевтың төбәк йәмәғәтселекте ҡабул итеү бүлмәһендә Берҙәм ҡабул итеү көнө йылына ике тапҡыр ойошторола. Дәүләт Думаһы, Дәүләт Йыйылышы — Ҡоролтай депутаттары халыҡ менән айына бер осрашһа, бүлексәлә көн һайын тиерлек брифингтар, республиканың төрлө министрлыҡ, ведомство вәкилдәре менән осрашыуҙар үткәрелеп тора.