Әлбиттә, уҡыу йорто күп үҙгәреш кисергән: төҙөкләнгән, матурайған, камиллашҡан. Уҡытыусылар ҙа, студенттар ҙа үҙгәргән. Күңелгә бик яҡын һәм ҡәҙерле аудитория, коридор, стеналар ғына шул килеш һаҡланған.
Мин эшкә килгәндә коллектив ең һыҙғанып юбилей тантанаһына әҙерләнә ине: бинала ремонт бара, музей асылырға тора, кабинеттар уҡыу әсбаптары менән тулыландырыла, ҡыҫҡаһы, эштең иң ҡыҙған мәле.
Бына, ниһайәт, юбилей көнө етте. Байрам тантанаһында республиканың мә­ғариф министры Әлфис Ғаязов, уның урынбаҫары Камилә Дәүләтова, сәнәғәт һәм инновация сәйәсәте министры урынбаҫары Рөстәм Хәйруллин, Өфө ҡала хакимиәте башлығы урынбаҫары Сынтимер Баязитов, Башҡортостандың Мә­ғарифты үҫтереү институты ректоры Рәмил Мәжитов һәм башҡа ҡунаҡтар ҡатнашты. Әлфис Суфиян улы сы­ғышында республикалағы урта һөнәри белем биреү учреждениелары араһында колледждың лайыҡлы урын тотоуын, бында студенттарҙың фәнни мөмкин­лектәрен күтәреү йәһәтенән ғалимдар менән тығыҙ хеҙмәттәшлек алып барылыуын, тәжрибә майҙансыҡтарының уңышлы эшләүен маҡтап телгә алды. Шулай уҡ студенттарҙың, педагогтарҙың әленән-әле халыҡ, төбәк-ара кон­курстарҙа, олим­пиадаларҙа, семи­нарҙарҙа, конферен­цияларҙа еңеү яулауында етәкселектең тос өлөшөн, эшмәкәрлектең дөрөҫ ойошторолоуын билдәләне, республикала мәктәпкәсә тәрбиә биреү белгестәренә ихтыяж ҙурлығы хаҡында әйтте.
Мәғариф министры колледж студенттарына һәм педагогтарға юғары наградалар тапшырғанда тамаша залы дәррәү алҡыштарға күмелде. Уҡытыусыларҙан B. Фәтхиева, С. Шевченко, Л. Степанова, С. Сираеваға ”Рәсәй Федерацияһының маҡ­таулы урта профессиональ белем биреү хеҙмәткәре”, “Башҡортостандың мәғариф алдынғыһы” тигән маҡтаулы исемдәр бирелде. Шулай уҡ В. Жидяев, Ю. Пугачева, Л. Ғәтиәтуллина Ми­нистрлыҡтың маҡтау грамотаһына лайыҡ булды. Студенттар араһынан Ә. Басирова, Л. Дауытова, Л. Дәүләтбаева Башҡортостан Президенты стипендиаты дипломын алып ҡыуанды.
Беҙҙең шатлыҡты шулай уҡ күрше Свердловск өлкәһендәге Ирбит гуманитар колледжы директоры Ирина Казаниева, Татарстандың Минзәлә, Яр Саллы, Ҡазан педагогия колледждары вәкилдәре лә уртаҡлашты, үҙ-ара теләктәшлек, белем һәм тәжрибә уртаҡлашыу өлкәһендә алып барылған эштәр өсөн рәхмәт һүҙҙәрен еткерҙе.
Юбилей тантанаһында ошо белем усағын 1942 йылда тамамлаған педагогия хеҙмәте ветераны, Рәсәйҙең һәм Баш­ҡортостандың атҡаҙанған уҡы­тыусыһы Сәлисә Кәримованың да булыуы бай­рамға мәртәбә өҫтәне. Ветерандың оҙайлы тырыш хеҙмәте республика педагогия училищелары һәм колледждары тарихында киң билдәле.
Һәр уҡыу йорто ҙур еңеүҙәре, асыштары, талантлы уҡыусылары, педагогтары менән дан тота. 75 йыл эсендә колледж 37 меңдән ашыу белгес әҙерләгән. Улар араһында фән докторҙары, төрлө кимәлдәге етәкселәр бар. Бөгөн колледждың яңыса тын алышы, заман талаптарына ярашлы үҫеше талапсан һәм уңған директор, педагогия фәндәре кандидаты Рәфҡәт Үмәрғәлиндең тырышлығына бәйле.