– Көн буйына ҡояш нурҙары төшөп, кәйефте кү­тәреп торған был фатирҙы үҙем һайланым. Үҙе яҡты, үҙе йылы, – тип беҙҙең менән шат­лығын уртаҡлаша Миләүшә. – Алты сутый ере­беҙ ҙә бар, бөтәһе лә бушлай. Быйыл тәү тапҡыр үҙебеҙҙең ҡул көсө менән үҫтерелгән йәшелсәнән мул ғына уңыш алып ҡыуандыҡ.
Талбазы ауылы ситендәге йәшел төҫтәге ҡуп­шы йорттарҙың хужалары – яңы ғына тормош юлына аяҡ баҫҡан, дәүләт тарафынан ҙур социаль ярҙам алған етем ҡыҙҙар һәм егеттәр. Тормош ауырлыҡтарын еңеп сығып, үҙаллы донъя көтөргә ынтылған һөнәрле йәштәрҙе бөгөн “етем” тип атарға тел дә әйләнмәй.
Миләүшә Сәләхова 12 йәштә балалар йортона килеп эләгә, аҙаҡ ғаиләгә тәрбиәгә би­релә. Тырыш­лығы менән училищела уҡып, аш­наҡсы-кондитер, аҙаҡ социаль хеҙмәткәр һөнәрҙәренә эйә була. Стәрлетамаҡ егете Ил­мир менән ғаилә ҡорғас, маҡ­саттар нығыраҡ асыҡлана.
– Ошондай өс йорттоң һәр береһендә ике­шәр фатир урынлашҡан. Майҙаны 33 квадрат метр тәшкил иткән торлаҡта бөтә уңай­лыҡтар ҙа булдырылған: ванна, бәҙрәф бар, эҫе, һал­ҡын һыуҙары крандан ағып тора. “ТермоХолс” предприятиеһы йорттарҙы хужаларға ҡул тей­ҙермәҫлек итеп, һәр эште еренә еткереп тап­шырҙы, – ти Ауырғазы районы хакимиә­тенең иҡтисад һәм күҙаллауҙар бүлеге белгесе Әлфиә Сафина.
Белгестең әйтеүенсә, әле торлаҡҡа сиратҡа ошо категорияға ҡараған 60 кеше ҡуйылған. Бы­йыл федераль һәм республика бюджеттарынан бүленгән 15 миллион һум аҡса үҙләш­терелергә тейеш. Киләсәктә етемдәр өсөн күп фатирлы йорт төҙөү ҙә планлаштырыла икән.
21 генә йәшендә Хөкүмәттең атайҙарса хәстәр­леген тойоп, күптәр әле хыялында ғына йөрөткән йорт-ерле булыу теләгенә өлгәшкән Миләүшә һәм башҡа йәш хужаларға бер генә теләк: йортоғоҙға — ырыҫ, күңелегеҙгә изгелек тулһын. Хеҙмәтегеҙ менән тыуған төбәгегеҙҙе йәмләп йәшәгеҙ, йәштәр!
...Йорт йыһаздары араһында бер аҙ юғалы­быраҡ ҡалған синтезатор, бер яҡ ситтәрәк бойо­ғобораҡ ултырған гармун, гитара иғтибарыбыҙҙы йәлеп итмәй ҡалманы. Баҡһаң, ғаилә башлығы Илмир Салауат музыка училищеһын тамамлаған, буш ваҡытында ошо музыка ҡоралдарын ҡулына алып, йортон йыр-моңға күмә икән. Өйө барҙың көйө бар, тип халыҡ юҡҡа әйтмәгән шул.