Ғәҙәттә, әҙәм балаһы ҡайҙа йөрөһә лә, тәү сиратта юлға иғтибар итергә күнеккән. Был аңлашыла ла – тигеҙ юлдарҙан кем йөрөргә яратмаһын. Шуға ҡалаға барып кереү менән беҙ ҙә иң тәүҙә машинабыҙҙы Яңауыл юл ремонтлау-төҙөү идаралы­ғы яғы­на борҙоҡ. “Башкиравтодор” дәүләт уни­тар предприя­тиеһының иң алдынғы идара­лыҡтарының береһе хаҡында күптән хә­бәр­ҙар булһаҡ та, маҡсатыбыҙ яңа­уылдар менән күҙмә-күҙ осрашып аралашыу, эштәр, килсәккә пландар, борсоған мәсьәләләр хаҡында фекер алышыу ине. Нисек кенә тимә, төбәктең йөҙөн тәү сиратта юлдар билдәләй.
Юл ремонтлау-төҙөү идаралығы бөгөн 600 саҡрымдан ашыу араны хеҙмәтләндерә. Бөтә ауылдарға ла елдереп кенә барып етергә була. Әле һуңғы айҙарҙа ғына, мәҫәлән, идаралыҡ хеҙмәткәрҙәре Өфө – Бөрө – Яңауыл юлына асфальт түшәгән, Яңауылдан Иҫке Күрҙемгә илткән арауыҡты төҙөкләндергән.
– Быйылға тәғәйенләнгән эш күләме 120 миллион һум самаһы тәшкил итә. Ҡулдан килерлек план. Техникаға ҡытлыҡ кисермәйбеҙ. Коллектив та татыу, берҙәм. Шуға эшләүе лә еңел. Әлбиттә, яуаплылыҡ та көслө булырға тейеш. Эшебеҙҙең һөҙөмтәһе халыҡҡа күренеп тора бит, — ти идаралыҡ начальнигы Радик Миңлеғәлиев.
Әйткәндәй, Радик Нәрислам улы – һөнәре буйынса төҙөүсе. Идара­лыҡҡа етәкселек итеүенә – 15 йыл. Ғүмер буйы төҙөкләндереү, төҙөү тармағында эшләгәнгә үҙ хеҙмәтенең үҙенсәлеген дә, әһәмиәтен дә яҡшы аңлай.
– Бер ваҡытта ла һан артынан ҡыуырға тырышмайым. Төп талап – си­фат. Саҡрым-саҡрым юлдар һалып та, бер-ике йыл үтеүгә унан атлап сыҡҡыһыҙ икән, хеҙмәтеңдең, тырышлығыңдың баһаһы ла ҡалмай, кәрәге лә юҡ, – ти ул.
– Төҙөк техника, берҙәм коллектив — былар барыһы ла дөрөҫ ойош­тороуға ҡайтып ҡала. Ә бына “географик зона” төшөнсәһе эшегеҙҙә артыҡ күп мәшәҡәттәр тыуҙырмаймы? — тип һорайбыҙ етәксенән.
– Был йәһәттән ҡайһы саҡта көньяҡ-көнсығыш райондарындағы хеҙ­мәттәштәремә көнләшеп тә ҡуям. Беҙҙә бит бер карьер ҙа, ҡаҙылма ят­ҡылыҡ та юҡ. Шуға күрә битумды – Салауат ҡалаһынан, ваҡланған ташты Салауат районынан ҡайтарабыҙ. Йыш ҡына хатта күрше Силәбе, Свердловск өлкәләренә лә сығып китергә тура килә. Ә бит быларҙың барыһы ла яғыулыҡҡа, техникаға, аҡсаға бәйле, – ти Радик Нәрислам улы.
Әңгәмә барышында идаралыҡ етәксеһе хеҙмәткәрҙәрен бер нисә тапҡыр маҡтап телгә алды. “Тәжрибәле оҫталар эшләй миндә”, – тине ул, ғорурланып. Ғорурланырлыҡ та шул. Мәҫәлән, Ф. Ғилмуллин, Д. Ғимаев, И. Камалетдинов, Р. Талипов, М. Хәтмуллиндарҙың эш стажы егерме йылдан ашыу. Уларҙың хеҙмәте республиканың юғары исемдәре, наградалары менән билдәләнгән. Әйткәндәй, идаралыҡта эшселәрҙең ялына, һаулы­ғына иғтибар ҙур. “Асы” шифаханаһында юлсылар ҙа, уларҙың ғаилә ағзалары ла йыл әйләнәһенә сәләмәтлеген нығыта ала.
Яңауыл юл ремонтлау-төҙөү идаралығының уңыш сере асыла төш­кәндәй булды – булдыҡлы етәксе, берҙәм коллектив. Иң мөһиме – ваҡыт менән иҫәпләшмәй эшләйҙәр. Шуға күрһәткестәре лә юғары.
Алһыу ӘҺЛИУЛЛИНА.