Йәш үтә барған һайын үткәндәр һағын­дыра, бер мәлгә онотолоп, бала саҡтағы уйындар менән зыҡ ҡубаһы килә. Һуңғы осорҙа Стәрлетамаҡ районы етәкселәре­нең дә күңеле шулай иләҫ-миләҫ булып киткән. Улар бигерәк тә “Осто, осто…” уйынын иҫтәренә төшөргән. Быға районда йөрөгәндә үҙем дә шаһит булдым. Етәклә­шеп түңәрәк яһағандар ҙа һамаҡлай-һамаҡлай мәж киләләр.
– Осто, осто, ерҙәр осто…
– Осто, осто, аҡсалар осто…
Бәй, әллә заман үтеү менән уйындың тәртибен дә үҙгәртеп алғандар инде. Шу­лай шул! Уйынға шул тиклем мауығып, улар хатта районды осороп ебәрә яҙғанын да һиҙмәйҙәр. Ҡайҙа ҡарама, эштәр хөртә­йә бара. Һуңғы ике йылда сәнәғәт етеш­тереүе түбәнәйә, табыш кәмей, бурыс арта. Ер биләмәләрен ҡуртымға алған ойош­маларҙың түләүе ҡаҙнаға килеп ет­мәй, һөҙөмтәлә 22 миллион һум осоп китә. 2014 йылда ғына ла ерҙе файҙаланған өсөн тейешле 7,6 миллион һум аҡса бурыс район хакимиәте ҡарары менән иҫәп­тән төшөрөлә.
Шуныһы ғәжәп: бығаса ауыл хужалығы буйынса республикабыҙ ғорурлығы һанал­ған төбәктә ерҙәрҙе ҡуртымға биреү йәһәтенән тәртипһеҙлек хөкөм һөрә, ба­­ҫыу­ҙарҙа сүп үләндәре ҡотороп үҫә, урын­дағы ҡаҙнаны тулыландыраһы мил­ли­он­дар елгә оса. Ха­лыҡтың пай милке һаналған ерҙәр ауыл хужалығы иҫәбенән сығарылып, йорттар тө­ҙөү, карьер асыу өсөн тотонола.
– Осто, осто, йорттар осто…
– Осто, осто, оят осто…
– Осто, осто яуаплылыҡ осто…
Муниципаль милек тә ҡанатлана бында. 2012 йылда дөйөм хаҡы 15,1 миллион һум тәшкил иткән “Спутник” ял базаһы район милкенә бирелә. Киләһе йылға бинаға идара итеү хоҡуғы “Колос” балалар һауыҡтырыу лагерына берке­телә. Һуңынан мөлкәт сауҙаһыҙ-ниһеҙ шәхси эшҡыуарға арзан хаҡҡа осо­рола. “Осто, осто” уйыны менән баштары әйлән­гән етәкселәр ерҙе ҡуртымға биреү хаҡында договор төҙөргә лә онота.
Юлдарҙы төҙөкләндереүгә тәғәйен аҡса­лар ҙа тегеләй-былай ҡанатлана, документтар тейешенсә тултырылмай, ә инде 1,4 миллион һум аҡса башҡарыл­маған эш өсөн оса.
Райондың Октябрь ауылында һыу үт­кәр­гес төҙөү өсөн контракт төҙөлә, уға 27 миллион һумдан ашыу аҡса күсерелә, әммә был сумма ҡайҙалыр осоп ғәйеп була.
– Осто, осто, миллиондар осто...
– Осто, осто, һыу торбалары осто…
Уйындың шарты буйынса осмай торған әйберҙәрҙе лә “оса” тигән һыу мейеләр язаға тарттырыла. Бер туҡтауһыҙ хаталанған Стәрле­тамаҡ етәкселәренә берәй сара табылырмы? Әллә “кеше осмай” тип урындарына йәбешкән кеүек ултырыуын дауам итерҙәрме?