Аҙаҡ был ҡағыҙ киҫәген иғтибарлап уҡып сыҡтым. Башҡа сығарған һорауға аҫтараҡ татар телендә “мөхәббәтме?”, “аҡсамы?”, “башҡа берәй нәмәме?” тип өҫтәлгән. Артабан Аллаһ һүҙе тураһында Инжилдән (Евангелие) өҙөмтәләр килтерелгән. Шунан “Ә ғаилә тормошон нисек бәхетле итергә кәрәк икәнен белер өсөн ғаилә төҙөлөшөнә нигеҙ һалған Йәһүәнән һорарға кәрәк”, “Яҡшы ир, яҡшы ҡатын йә яҡшы ата-әсә булыр өсөн нимә эшләргә?” тип яҙылып, “Изге Яҙмалар китабығыҙ булмаһа, уны фәлән-фәлән сайттан табып була” тиелгән. Һуңғы битендә “Күберәк белер өсөн Йәһүә шаһиттары менән Изге Яҙмалар буйынса фекер алышығыҙ” тип кәңәш бирелгән дә “Миңә уларҙың береһе килеп китһен” тигән мөрәжәғәткә исем-шәрифеңде, адресыңды өҫтәп яҙып, тултырылған купонды Санкт-Петербургка ебәрергә ҡушылған.
Был “Йәһүә шаһиттары” дини ағымының күп һанлы низағтар уртаһында торғанын, шикле эш алып барғанын ситкә ҡуйып тороп, шуны ғына әйткем килә: беҙҙең, мосолмандарҙың, үҙебеҙҙең ҡиблабыҙ юҡмы, Ислам дине етмәйме, хәҙер килеп ошондай сит-ят күренештәргә ылыға башланыҡмы?! Үҙәге Америкала булған был ойошма, туған телдәребеҙҙә әҙәбиәт баҫтырып, урыҫ һәм башҡа милләттәрҙе генә түгел, татар, башҡортто ла үҙ сафына инергә өндәп ята түгелме һуң? Күңелдең ниндәй ҡылына ҡағылырға ла белгәндәр бит: имеш, ғаилә тормошоңдо яйға һалырға теләйһеңме? Мәңгелек ҡиммәттәр тураһында мәғлүмәтте ана һөтө менән һеңдереп үҫәбеҙ – был билдәле хәҡиҡәт инде ул. Ә бына ғаилә тормошон нимә, мәҫәлән, бәхетһеҙ иткәнен бер миҫал өлгөһөндә һөйләп үтә алам.
...Азамат менән Динара (исемдәрҙе үҙгәртеп алам) Өфөлә тыуып үҫеп, бик яратышып өйләнеште. Тиҙҙән улдары тыуҙы. Йәш парҙы донъя мәшәҡәттәре әллә ни бимазаламаны, сөнки кәләштең ата-әсәһенән дүрт бүлмәле фатир ҡалғайны. Рәхәтләнеп йәшә генә. Әммә күп тә тормай Динара кришнаизм ағымына (һинд диндәренең береһе) эләгеп китте. Иҫләйһегеҙҙер, элегерәк баш ҡала урамдарында сәйер төркөм, музыка ҡоралына ҡушылып, бер туҡтауһыҙ: “Харе Кришна!” – тип мантра ҡысҡырып йөрөй торғайны. Бер аҙҙан ҡатын фатирын һатып, ҡулға ингән килемгә ураған һайын Һиндостанға сәфәргә барыуҙы йолаға әйләндерҙе. Шулай бар аҡсанан бер миллион һум ғына ҡалды. Инде был сумма яңы торлаҡ һатып алырға ла етмәй ине. Шулай ҙа Азамат уны тәүге иғәнә итеп индереп, төҙөлөп ятҡан йорттан фатир юлланы. Ләкин тормош йәнә бәғерһеҙлеген күрһәтте – ир эшһеҙ ҡалды. Һөҙөмтәлә кредит түләү мөмкинлеге бөттө. Ә банк фатирға арест һалдырып, уны һаттырҙы.
Ғаилә тарҡалды. Азамат икенсегә өйләнеп тә уңманы, улы атайһыҙ үҫә, Динараны күптән күргәнем юҡ. Ят диндәр, сит ҡылыҡтар бәхет килтермәгәнен аңланымы икән ул, юҡмы – белмәйем.