– Әллә һеҙҙә һабантуй көҙгә күсерелдеме? – тип һорайым беҙҙе уҙып киткән бер ағайҙан.
– Юҡ, сентябрҙә урман хеҙмәткәрҙәре көнө бит, шунда ашығам, – тине ул.
Ысынлап та, Бағаҙы буйы һабантуйҙы хәтерләтә: яр буйында автомашиналар теҙелгән, халыҡ мыжғып тора. Бәй, бында урмансыларҙың байрамы айҡанлы бәйге ойошторолған да баһа!
Район хакимиәте вәкиле Наил Ғиндуллин егеттәрҙе “Ҡоймаҡ” конкурсында ҡатнашырға саҡырыуға, унлаған ир-уҙаман әҙерлек һыҙығына килеп тә баҫты.
Наил Ғәйфулла улы аңлатыуынса, бүрәнәнән ҡоймаҡ йоҡалығындай ғына әйбер бысырға кәрәк. Тимәк, конкурсант уны мөмкин тиклем нәҙегерәк итергә тейеш. Бына бысҡылар шажларға тотондо, “ҡоймаҡтар табанан төшә” башланы. Жюри ағзалары билдәләүенсә, иң йоҡаһын Линар Мостафин “ҡойҙо”.
– Бәләкәйҙән бысҡы, балта менән дуҫ инем, урмандан сыҡманым, – ти электр бырауы менән бүләкләнгән Линар Мәрүән улы. – Күпме йәрәхәт алғанымды атайым ғына белә. Өфө урман хужалығы техникумын тамамлап, ауылға эшкә ҡайттым. Яңы Бәрҙәштә әле донъя көтәм, шәхси эшҡыуар Хисамовта эшләйем.
Линар кәләше Рәфилә менән (ул – уҡытыусы) Линара, Нәркәс һәм Ранис исемле балалар үҫтерә.
Бынан тыш, тиҙлеккә утын бысыу, бысҡыны һүтеп йыйыу, белемде тикшереү буйынса ла көс һынашты урмансылар.
Район хакимиәте башлығының беренсе урынбаҫары Илдус Мусин билдәләүенсә, бындай сара районда йыл да тиерлек уҙғарыла, конкурс урмансы һөнәренең абруйын күтәрә.
Бай тәьҫораттар менән Бағаҙы буйынан ҡайтырға сыҡҡанда бер төркөм малай күҙгә салынды. Хәбәрҙәренә ҡарағанда, барыһы ла киләсәктә яҙмышын урман менән бәйләмәксе.
– Минең исемем Мансур, лесникка уҡыясаҡмын!
– Искәндәр булам, ә миңә техник һөнәре оҡшай!
Вадим, Марат һәм башҡалар ҙа ағас эшенә мөкиббән бирелгән. Баҡтиһәң, дуҫтарҙы бында берәү ҙә саҡырмаған, һәр кем үҙ теләге менән килгән. Тимәк, урмансылар байрамының әһәмиәте баһалап бөткөһөҙ ҙур. Йәш быуында ошо һөнәргә ҡарата һөйөү уятыуға, улай ғына ла түгел, тәбиғәткә һаҡсыл ҡараш тәрбиәләүгә лә этәргес бирҙе ул.