Әлбиттә, санкцияның сәйәсәт өлкәһенә ҡағылмайынса, иҡти­садҡа туҡталһаҡ, ғәйептең үҙе­беҙҙә лә булыуын танымау мөм­кин түгел. Шулай булмайынса, ниндәй ауыр һуғыш һәм унан һуңғы йылдарҙа ат, һыйыр егеп эшкәртелгән ерҙәр ҡеүәтле техника заманында үгәйһетелеп, етемһерәп, ағас һәм ҡый үлән­дәре баҫып ята, колхоз-совхоз­дарҙың байлығы күҙ асып йом­ған арала әллә ҡайҙа осто ла бөттө. Һөҙөмтәлә халыҡты туй­ҙырыусы ауыл эшсәндәре эш­һеҙ-ниһеҙ ауыҙ асып торҙо ла ҡалды. Аптырайһы ла түгел шул, дилбегә ҡулдарында саҡта беҙҙең чиновниктар элеккене тәнҡитләргә, кәмһетергә һәм үҙҙәренән себен осорорға ярата.
Ысынында иһә элеккеләр, хә­ҙерге депутаттар һәм чиновниктар кеүек, үҙҙәренә эш хаҡы һәм ниндәйҙер ташламалар алыу ту­ра­һында баш ватмаған, ә ха­лыҡ­ты ҡайғыртҡан. Хатта В.И. Ле­­­нин­дың үҙенә иғәнәлек кенә аҡса өҫтәүгә лә ҡаршы төшөүе, 800 һум эш хаҡы алған Л. И. Брежневтың үҙенән 50 һумға күберәк алған министр Ю. Чурбановтың эш хаҡын тикшертеүе кеүек ми­ҫал­дар етерлек бит, ә бөгөнгө чи­нов­никтарҙың деклара­ция­ла­рына күҙ һалһаң, күбеһенең айлыҡ килеме миллионлап, ҡатындары ла уларҙан ҡалышмай. Бына шуларҙыҡын айына 3-5 мең һум алып эшләүсе ауылдыҡылар­ҙыҡына ҡушып бүлһәң, уртаса ҡолаҡҡа ятмаған эш хаҡы килә лә сыға инде.
Эшһеҙлек, дауаханаларҙың ябылыуы кеүек күренештәр бер ни тиклем тәүтормош община ҡоролошо дәүерен хәтерләтә. Мәғариф реформаһы нигеҙҙә ауыл мәктәптәрен юҡҡа сыға­рыуға йүнәлтелһә, әллә ниндәй өҫтөнлөклө программа­ларға та­янған һаулыҡ һаҡлау өлкәһен­дәге үҙгәрештәрҙең ғәмәлдә ауылдарҙы бөтөрөүгә алып барғаны һәр кемгә асыҡ. Ә ауылдар бөтһә, аҙыҡ-түлек өлкә­һендә кем санкцияға ҡаршы көрә­шә алыр?
Бөгөн килеп Рәсәй ауыл ху­жа­лығы министры Николай Федо­ровтың, “Рәсәй аҙыҡ-түлек ме­нән үҙен тулыһынса тәьмин итә ала”, тип ышаныслы асыш яһа­уы үҙгәртеп ҡороуҙан һуңғы яңы­лыҡ булып яңғыраған һымаҡ. Европа беҙҙең өсөн өлгөгә әй­ләнеп, күптәр уларса ҡылана башланы: шулар тәҡдиме менән йәшәргә күнектек, телмәребеҙ ят һүҙҙәр менән сыбарланды, магазиндар сит илдәрҙең аҙыҡ-түле­ге менән тулды, түрәләр үҙҙәре башлап иномаркаларға ултыр­ҙы, милли валютабыҙҙы доллар алмаш­тырҙы, эш хаҡтары ара­һында ҙур айырма булһа ла, шу­ларға ҡарап әйберҙәргә хаҡ­тар­ҙы арттырырға тотондолар. Мәктәп­тәрҙә сит телдәргә иғтибар арт­ты, ә ҡаланыҡыларҙа үҙебеҙҙең дәүләт телен уҡытыу әле тулы­һынса хәл ителгән, тип әйтеп булмай. Ни өсөндөр сит телдәр­ҙе, әйтәйек, шул уҡ донъяны бу­тап ятҡан немец телен уҡы­тыу­ға бер ҙә ата-әсәләр риза­лығы кә­рәкмәй, ә үҙебеҙҙең мил­ли телгә кәрәк. Бына һиңә мә! Ә инде баш ҡалабыҙға килгәндә, милли рух бөтөнләй һиҙелмәгәндәй, магазин исемдә­ренең ниндәй телдә һәм ни өсөн шулай яҙылыуын да аңламаҫ­һың.
Санкцияға ҡаршы санкция иғлан итеү бик отошло сара бул­ды шикелле, тик бер тотонғас, ҡатыраҡ аҙымдар кә­рәк ине, кем менән шаяр­ған­да­рын белһен­дәр. Ир­тә­гә­ме-һуңмы, мәсхәрәгә ҡалған ауыл хужа­лығын элекке хәленә ҡайта­рырға тура киләсәк. Элек бит үҙебеҙ сит илдәргә күп­ләп һата инек, бөгөн килеп, үҙе­беҙҙе үҙебеҙҙекеләр төп башы­на ултыртҡан хатаны оно­тор­ға ярамай. Шулай уҡ Өфө урам­да­рын­дағы мәғәнәһеҙ, телә­һә нин­дәй ят, сит телдәге ата­маларҙы алмаштырыу мотлаҡ, был сара милләтебеҙгә абруй ҙа өҫтәр.
Санкция булғас, санкция бул­һын: халыҡ байлығын урлап, сереп байыған олигархтарҙы ла, коррупционерҙарҙы ла, ришүәт­се­ләрҙе лә ауыҙлыҡларға ваҡыт. Халыҡтыҡы халыҡҡа булырға тейеш тигән хәҡиҡәтте лә тура мәғәнәһендә ҡулланырға кәрәк. Уларҙың эш хаҡын да ҡыҫ­ҡартҡанда, күп һөйләргә күнек­кән депутаттыҡын да ике-өс мәртәбә кәметкәндә, бәлки, улары ла һайлаусыларын иҫенә төшөрөр ине. Ҡыҫҡаһы, ғәҙел­һеҙлеккә сик ҡуйырға, артҡанын осон-осҡа ялғап йәшәгән ха­лыҡҡа бүлергә һәм миллион һумлап урлағандарҙың мөлкә­тен тулыһынса конфис­кация­ларға ваҡыт етте.