Рәйсә Юныс ҡыҙы тәжрибәле уҡытыусы – уның хеҙмәт стажы алтмыш йылға яҡын. Бөйөк Ватан һуғышы башланыр алдынан ғына атаһы вафат була, шуға күрә ҡыҙға уҡыуын туҡтатып, туғандарын ҡарар өсөн мәктәпкә эшкә төшөргә тура килә. Уны Таймаҫ урта мәктәбенә урыҫ теле уҡытыусыһы итеп ебәрәләр. Унда ике йыл эшләп алғас, Рәйсә институтҡа уҡырға инә. Әммә тырыш ҡыҙ белем эстәүен бының менән генә туҡтатмай, Башҡорт дәүләт университетын да ситтән тороп уңышлы тамамлай. Артабан йәш белгес Күмертауға күсеп бара һәм бөтә ғүмерен ошо ҡала менән бәйләй.
– Үҙ предметымды шул тиклем хөрмәт итәм, яратам, хатта һүҙ менән дә аңлатып бирерлек түгел, – тип һөйләй ине ул беҙгә. Рәйсә Юныс ҡыҙының байтаҡ уҡыусыһы, остазынан өлгө алып, уҡытыусы һөнәрен һайланы, шуларҙың береһе – Рәшит Солтангәрәев – танылған яҙыусы булып китте.
Уҡыусыларының береһе Венера Зарипова былай тип хәтерләй:
– Рәйсә Юныс ҡыҙы балаларҙы юмор тойғоһо менән үҙенә буйһондорҙо. Ғәмһеҙ уҡыусыны намыҫына теймәй генә “сәнсеп” ала торғайны, бынан һуң уҡытыусының тура һүҙенә башҡа эләкмәҫ өсөн ул үҙен өлгөлө тоторға тырышты. Апайҙың беҙгә биргән һәр дәресе бәләкәй спектаклгә әйләнә ине, бындай алым беҙгә ифрат оҡшаны. Уның уҡыусылары юғары уҡыу йортона уҡырға ингәндә имтихандарҙы гел “бишле”, “дүртле” билдәләренә генә тапшырҙы.
Рәйсә Сафиеваның тормошо мәктәп һәм ғаилә менән генә сикләнмәне, күп йылдар ул йорт комитеты рәйесе булып эшләне. Тырыш, намыҫлы хеҙмәте, йәмғиәт тормошонда әүҙем ҡатнашҡаны өсөн бер нисә тапҡыр ҡала хакимиәтенең маҡтау грамотаһы менән бүләкләнде.
Уның телефоны 1 сентябрҙә генә түгел, иртәгәһенә лә бихисап ҡотлау ҡабул итә. Яңы уҡыу йылы башланып киткәс тә, уҡытыусыбыҙ үҙенең тыуған көнөн билдәләй. Ошо ике матур байрам уңайынан Рәйсә Юныс ҡыҙына бөтә уҡыусылары исеменән гәзит аша тәбрикләү һүҙҙәрен еткерәм, уға ҡоростай ныҡлы һаулыҡ, оҙон ғүмер теләйем.