Любезники-любизар,
Маладис, маладис!
Ҡурайҙа башҡарылған “Любизар” һәм Ватан һуғышына арналған башҡа йырҙар кисә республиканың Хәрби дан музейын яңғыратты. Унда Рәсәйҙең 1812 йылғы Ватан һуғышында еңеүенә 200 йыл тулыуға арналған “Юҡҡа ғына хәтерләмәй Рәсәй...” күргәҙмәһе асылды.
Музейға килеп инеү менән шул тарихи осорҙағы хәрбиҙәрсә кейенгән кешеләр осраны. Улар араһында “башҡорттар” ҙа, “урыҫтар” ҙа бар ине. Башҡорт хәрби кейемдәрен — “Төньяҡ амурҙары”, ә урыҫтарҙыҡын “Өфө пехота полкы” клубтары ағзалары күрһәтте.
Музейҙың икенсе ҡатында урынлашҡан экспозиция өс өлөштән тора. Тәүгеһендә — график эштәр һәм гравюраларҙың фотокүсермәләре. XIX быуат башындағы билдәле һәм билдәһеҙ авторҙарҙың эштәрендә башҡорт хәрбиҙәре һүрәтләнгән, улар музейҙарҙа һәм республика архивтарында һаҡланған. Икенсе өлөшөндә — хәҙерге ваҡытта үткәрелеп торған хәрби-тарихи реконструкцияларҙа ҡатнашыусыларҙың фотоһүрәттәре. Ә өсөнсөһөндә республиканың хәрби-тарихи клубтарында файҙаланылған атрибуттар, тарихи костюмдар ҡуйылған.
Күргәҙмәне ойоштороусы Хәрби дан музейы хеҙмәткәрҙәре әйтеүенсә, экспозиция күсмә буласаҡ, уны республиканың күп кенә район һәм ҡалаларында ла күрһәтмәкселәр.
Сараны асыу тантанаһында республиканың Мәҙәниәт министрлығы вәкилдәре, хәрби-ватансылыҡ тәрбиәһе биреү клубтарында шөғөлләнеүселәр, киң мәғлүмәт саралары вәкилдәре ҡатнашты.
Музей директоры Илшат Үтәев күргәҙмәгә ҡуйылған экспонаттар тураһында һөйләне, уның йыл дауамында эшләйәсәген әйтте. Теләгән һәр кешене, айырыуса йәштәрҙе, килеп танышырға саҡырҙы.