Яңы Ҡарас ауылында мәсет бер йыл элек төҙөлә башлағайны. Ошо арала төйәктә гүйә ки бәрәкәт артты: урамдар таҙарҙы, өйҙәр күркәмләнде, кешеләр тағы ла мәрхә­мәтлерәк, бер-береһенә иғти­барлыраҡ булып китте. Иман йорто ҙур көскә эйә шул.
Ауыл аҡһаҡалдарының әйтеүенсә, Яңы Ҡараста элек ике мәсет булған. Билдәле, Совет осоронда уларҙың эшмәкәрлеге туҡтатылған, һө­ҙөм­тәлә халыҡ оҙаҡ йыл­дарға рухи байлыҡтан, дини байрамдар уҙғарыуҙан мәхрүм ҡалған.
Былтыр иһә күрше Татарбай ауылынан “Ағиҙел М” йәмғиәтенең генераль директоры Филүс Ғилфанов Яңы Ҡараста Аллаһ йорто төҙөү эшенә тотондо. Изге ниәтте халыҡ шунда уҡ күтәреп алды, йүнселгә һәр кем хәленән килгәнсә ярҙам итте. Һөҙөмтәлә “Хәтмулла” мәсе­те бер йыл эсендә әҙер ҙә булды.
Уны асыу тантанаһына яҙмышы Яңы Ҡарасҡа бәйле барлыҡ халыҡ, шулай уҡ төрлө яҡтан ҡунаҡтар йыйылды.
– Мишкә – бихисап милләт вәкилдәрен һыйындырған бәрәкәтле төбәк, – тине үҙ сығышында Башҡортостан мосолмандарының Диниә назараты рәйесе мөфтөй Нурмөхәмәт хәҙрәт Ниғмә­тул­лин. – Унда хәҙер инде туғыҙынсы иман йорто асылды – быға ифрат шатмын. Нур, изгелек бөркөлөп торған, күңелдәрҙә мәр­хәмәтлек, толерантлыҡ тәр­биәләнгән рухи мөйөш яңы бейеклектәргә, ҡаҙаныш­тарға юл асһын. Ауыл үҫһен, сәскә атһын. Мәсет янында, иншаллаһ, балалар өсөн майҙансыҡ та төҙөлөр тигән теләк бар.
Нурмөхәмәт хәҙрәт район хакимиәте башлығы Виталий Андреевҡа “Ҡөрьән” бүләк итте, иман йортон төҙөткән Филүс Ғилфановҡа – Рәхмәт хаты, мәсеткә бер ҡосаҡ дини китап тапшырҙы.
Яңы Ҡараста тыуған ерен яратҡан, эшһөйәр, бер-береһенең ҡәҙерен белгән халыҡ йәшәй. Был хаҡта үҙ сығышында район хакимиәте башлығы ла әйтеп үтте.
– Мәсет ауылды тағы ла нурландырып ебәрҙе, – тине Виталий Михайлович. – Яңы Ҡарас халҡы “Айыҡ ауыл” республика конкурсында ла ҡатнашыр тигән теләгем бар.
Эшҡыуар Филүс Ғилфанов иһә башланғысын күтәреп алған һәр кемгә рәхмәт белдерҙе.
– Мәсет бар ерҙә алдағы көнгә ышаныс йәшәй, – тине ул. – Киләсәктә халыҡ иманға килеп, барлыҡ ғаиләләр ты­ныс­лыҡта, татыулыҡта ғүмер итһен, ауылдың тамырҙары ныҡ булһын.
Филүс Кәшфулла улы халыҡты мәсеттең имам-хатибы Әхмәт хәҙрәт менән таныштырҙы. Унан “Хәтмул­ла”ла йәмәғәт менән тәүге өйлә намаҙы уҡылды.