Емерелгән һәм өлөшләтә зыян күргән йорттарҙы тергеҙеү менән танышыуҙы Рөстәм Зәки улы Яңауыл районының Конигово ауылынан башланы. Ул бында ҡазаға тарығандар менән аралашты, халыҡтың һорауҙарына аныҡ яуап бирҙе. Ауыл фажиғәнән һуң ҡалған сүп-сарҙан тотошлай таҙартылған, ҡолаған бағаналар алмаштырылып, электр энергияһы бирелгән. Әле өй ҡыйыҡтарын йүнәтеү, талап ителгәндәренекен тулыһынса яңынан ябыу, кәртә-ҡураны рәтләү бара. Зыян күргән йорттарҙы төҙөкләндереүҙә биш тиҫтәнән ашыу төҙөүсе шөғөлләнә. Район хакимиәте башлығы Илшат Вәзиғәтов белдереүенсә, аҙна аҙағына тиклем тергеҙергә яраҡлы торлаҡ буйынса эш теүәлләнәсәк. Ә инде ныҡ зыянланған бер нисә йорт урынына яңыларын һалыу дауам итәсәк.
Рөстәм Хәмитов, көҙгө ямғырҙар башланғансы, ҡыйыҡ ябыуҙы мотлаҡ тамамлау кәрәклеген айырым билдәләне.
Республика Президенты вазифаһын ваҡытлыса башҡарыусы ауыл урамы уртаһында халыҡты ҡабул итеүҙе ойошторған “Росреестр” күсмә офисының эше менән танышты. Ойошманың Яңауыл бүлексәһе етәксеһе Айгөл Мостафина аңлатыуынса, халыҡтан алынған 15 ғариза буйынса мәсьәлә ыңғай хәл ителгән.
Дауыл эҙемтәһендә өйө ҡыйыҡһыҙ ҡалған Тайфа Семенова менән аралашҡанда, Рөстәм Зәки улы, “ҡышҡа тиклем яңы йорт төҙөп бирәсәкбеҙ”, тип хеҙмәт ветеранын ныҡ шатландырҙы. Хужабикә үҙ сиратында, биш мең һум компенсация алыуын, бушлай аҙыҡ-түлек биреүҙәрен телгә алып, ауыл, район һәм республика етәкселегенә ауылдаштары исеменән оло рәхмәт белдерҙе.
Яңауыл ҡалаһының Көнсығыш биҫтәһендә емерек­лектәр тулыһынса таҙартылған, ҡазаға тарыған 148 шәхси йорттоң 25-е йүнәтелгән. Республика Хөкүмәте Премьер-министрының беренсе урынбаҫары Рәүеф Ноғомановтың һүҙҙәренсә, был — төҙөкләндереү эштәрен дөрөҫ ойоштороу һөҙөмтәһе. “Күмәк ҡулға эш түҙмәй” тип юҡҡа әйтмәгәндәр. Зыяндың күләменә һәм дәрәжәһенә ҡарап, тер­геҙелергә тейеш торлаҡ өс төргә бүленгән һәм уларға 14 предприятие беркетелгән. Һәр кем оло яуаплылыҡ тойоп эшләй.
Биҫтәлә бәләгә тарығандарға мәғлүмәти ярҙам күрһәтеү штабын ҡарағас, Рөстәм Хәмитов халыҡҡа төрлө мәсьәлә буйынса белгес кәңәше биреүҙе артабан әүҙемләштереү кәрәклеген әйтте.
Краснокама районының Ҡарый ауылында республика Президенты вазифаһын ваҡытлыса башҡарыусы торлаҡ йорттарҙы тергеҙеү һәм йүнәтеү барышын ҡараны, халыҡ менән һөйләште. Ғәрәсәттән бындағылар нығыраҡ зыян күргән: 32 йорт тулыһынса емерелгән, 71-е етди зарарланған. Уларҙың хужаларына яуап итеп һәм төҙөүселәргә төбәп, Рөстәм Хәмитов: “Өйҙө төҙәтергәме, әллә яңынан һалырғамы тигән икеләнеү булғанда, бары тик яңы йорт күтәреү тураһында ҡарар ҡабул ителергә тейеш”, — тип айырып билдәләне.
Ғәҙәттән тыш хәл эҙемтәләрен бөтөрөү штабында республика Хөкүмәте ағзалары, муниципаль власть һәм хоҡуҡ һаҡлау органдары, төҙөлөш ойошмалары һәм социаль хеҙмәттәр етәкселәре һәм вәкилдәре ҡатнашлығында эш кәңәшмәһе үткәрелде.