Рәсәй Хөкүмәте Ҡырымды шифаханалар, һауыҡтырыу һәм ял үҙәге булараҡ күрергә теләй, уның тиҙҙән табышлы эшлә­йәсәгенә иҫәп тота. Севас­топол­дә халыҡтың тәбиғи кәмеүе күҙәтелә, йөрәк-ҡан тамырҙары сирҙәренән үлем осрағы Рәсәй­ҙәгенән — 17, ә яман шеш сир­ҙә­ренән 33 процентҡа юға­рыраҡ. Табиптарға ҡытлыҡ ҙур, ә хеҙмәт хаҡы Рәсәй буйынса уртаса күрһәткестең 44 процентын тәшкил итә. Маҡсат бер: 2018 йылға тиклем Ҡы­рымдағы медицинаны бөгөнгө көрсөк хәленән сығарыу.
Беҙ егерме йыл буйы үҙләш­тергәнде ҡырымдарға ярты йыл эсендә тормошҡа ашырыу бурысы ҡуйыла. Медицина терминын ҡулланып әйткәндә, “тормош анамнезы” яҡшы, шуға ла булдыҡлы депутаттарҙы һай­лауҙың ни тиклем мөһимлеге көн үҙәгендә тора.
Әсәлек һәм балалыҡты һаҡ­лау буйынса Башҡортос­танда ҙур тәжрибә туплаған белгес, Дәүләт Думаһы депутаты Сәлиә Мырҙабаева Ҡырымда тәүге тапҡыр түгел. Төбәктең һаулыҡ һаҡлау етәкселеге менән әңгәмәлә ул бына һигеҙ йыл элек ил Президентының Федераль Йыйылышҡа Мөрәжә­ғәт­намәһендә яңғыраған: “Ә хәҙер мөхәббәт хаҡында һөйлә­шәйек”, — тигән ҡанатлы һүҙ­ҙәрен иҫкә төшөрҙө. Ошо ли­ри­ка нигеҙендә һаулыҡ һаҡ­лауҙағы етди реформалар, демографик сәйәсәтте һәм рәсәйҙәрҙең тормош сифатын яҡшыртыу мәсьәләләре торған­лығы бөгөн һәр кемгә билдәле.
– Һеҙҙә ошондай уҡ тәрән үҙгәрештәр тормошҡа ашыры­лырға тейеш. Һүҙҙә түгел, ә етди финанс ағымы ярҙамында медицина тармағы камиллаш­тырыласаҡ, — тип белдерҙе Сәлиә Шәрифйән ҡыҙы. Ул шулай уҡ 2016 йылда индере­ләсәк хеҙмәткәр менән эш биреүсе араһындағы килешеү­ҙең яңы формаһы тураһында аңлатма бирҙе. Хеҙмәт хаҡы белгестәрҙең нимәгә һәләтле булыуынан сығып билдәләнә­сәк. Мәҫәлән, көн дә операция яһаған ике хирургты алайыҡ. Береһе аппендиксты ғына алып ташлаһа, икенсеһенә ҡатмарлы операциялар яһарға тура килә. Тимәк, хеҙмәт хаҡының дәрт­лән­дереү өлөшө иҫәбенә уларҙың эшенә түләү ҙә төрлөсә буласаҡ.
Депутат шулай уҡ медицина хеҙмәткәрҙәренең социаль мәсьә­ләләрен хәл итеүгә туҡталды. Илдә ғәйәт ҙур реформа үткәрелеүенә ҡарамаҫ­тан, былтыр Рәсәй халҡының 50 проценты медицина ярҙамынан ҡәнәғәт булмаған. Нигеҙҙә, ул кадрҙарҙың етешмәүенә бәй­лән­гән.
Киләһе йылдың 1 ғинуа­ры­нан әсәлек капиталын Ҡырымда ла ала башлаясаҡтар. Оҙаҡламай һаулыҡ һаҡлау учреждениеларына ағыласаҡ өр-яңы медицина ҡорамалдары эшһеҙ тормаһын өсөн хәҙерҙән белгестәрҙе әҙерләү зарурлығы бар. Дәүләт Думаһының Һаулыҡ һаҡлау комитеты ағзалары Керчь, Симферополь, Севастополь, Саки ҡалаларында медицина хеҙмәткәрҙәре менән осрашып, фекер алышты. Сәлиә Мырҙабаева федераль кимәлдә улар өсөн ташламалы ипотека буйынса программаның булмауын билдәләп, был тәңгәлдә эш алып барасаҡтары хаҡында белдерҙе.
Бурыс ғәйәт ҙур. Респуб­ликаның ырамлы аҙымдар ме­нән көрсөктән сығып, дотацияға мохтаж төбәктән көслө, табышлы һауыҡтырыу үҙәгенә әүерелеүенән һәр кем отасаҡ ҡына. Бының өсөн бары ихтыяр көсө, һәр һумды бәрәкәтле тотоноу, ойоштороу һәләте талап ителә.