Фәрхейыһан апай ауыл Советында 35 йыл буйы секретарь булып эшләгәнгә күрә, Түрештәге һәр кемдең донъя хәлен, һәр ғаиләнең һулышын, проблемаларын белеп-күреп тора.
– Уңған, сәмле халыҡ йәшәй беҙҙә. Ҡарттар ҙа ҡул ҡау­шырып ултырмай, бала-сағаһы тыуған йорттарынан ҡош­соҡ­тай осоп таралышып бөтһә лә, һаман да үҙаллы, мул­лыҡта йәшәү өсөн тырыша: мал тота, умарта ҡарай, ҡош-ҡорт аҫрай, йәй буйы ейән-ейәнсәрҙәрен ҡунаҡ итә. Ауылдың шифалы һауаһын һулап, тәмле һөт-ҡатығын эсеп үҫкән балалар күңелендә ауыл тормошо ожмах мөйөшөндәй оҙаҡ йылдар һынланасаҡ әле, – ти Фәрхейыһан апай.
Уның да балалары, үҫеп еткәс, һөнәр алып, төрлө тө­бәк­тәргә таралышҡан. Әлфиәһе – Ноябрьскиҙа, Әлфи­нәһе Өфө ҡалаһында төпләнгән, улы Ильяс Бүздәктә ғаилә ҡорған. Бер саҡ Әлфинәгә, балаһы бәләгә тарығас, дауаханала оҙаҡ ятып дауаланырға тура килә. Өләсәлә­ре ғаи­ләнең иң ауыр, мәшәҡәтле мәлендә ярҙамға ашы­ға – Әлфинәнең ваҡытлыса әсә тәрбиәһенән мәхрүм ҡал­ған ҡыҙын үҙенә алып, өс йыл буйы ейәнсәрен ҡурсалап үҫтерә, балалар баҡсаһына йөрөтә.
Тынғыһыҙ Фәрхейыһан апай йәй баҡса тултырып картуф үҫтерә, өй алдындағы күҙҙәрҙе иркәләгән аллы-гөллө сәс­кәләр ҙә, баҡсаларында күпереп үҫкән күстерә үләне лә – уның тырыш хеҙмәте емеше.
– Бесәнде туғандарҙың мал-тыуары өсөн үҫтерәм, — тип аңлата апай. — Ә улар мине һөт-ҡаймаҡтан өҙмәй. Ер бит барыһын да бирә, туйҙыра, йәшәтә — ҡәҙерләй белергә генә кәрәк үҙен.
Түрештең киң урамы ҡаңғылдашҡан ҡаҙҙар тауышына тулды. Йәшел сирәмде аҡ болоттар кеүек ҡаплаған ҡоштар, хужабикәһен танып, Фәрхейыһан апайға табан ыңғайланы. Алсаҡ та, ябай ҙа ауылдың һоҡланғыс йәме бит улар.