– Әле ҡаланың 15 балалар баҡсаһында өс меңдән ашыу сабый тәрбиәләнә. Ата-әсәнең мөрәжәғәтен һәр саҡ ыңғай хәл итергә тырышабыҙ. Әммә шуны ла билдәләп үтергә кәрәк: йыл һайын ҡалаға ауыл еренән күпләп күсеп киләләр, уларҙың балаларын урынлаштырыу мәсьәләһе бер аҙ ҡыйынлыҡтар тыуҙыра. Элегерәк ата-әсә сабыйы тейешле йәшкә еткәс кенә урын даулай башлаһа, бөгөн барыһы ла Интернет аша сиратҡа теркәлә. Йәғни сабый донъяға килгәс тә, бер нисә көн эсендә уны балалар баҡсаһына сиратҡа ҡуялар.
Һуңғы йылдарҙа ҡалала “Әкиәт”, “Сулпылар”, Рамазан Өмөтбаев исемендәге лицей ҡарамағындағы “Аманат” балалар баҡсалары, Арҡайым ҡасабаһында мәктәп һәм мәктәпкәсә йәштәгеләр өсөн берлектәге комплекс асылды, “Тейенкәй”ҙә һәм “Тирмәкәй”ҙә 60 урынлыҡ өҫтәмә төркөм булдырылды. Был учреждениелар ҡарамағында ғаилә төркөмдәре лә уңышлы эшләп килә. Был йүнәлеш буйынса “Айгөл”, “Аманат” баҡсалары айырым иғтибарға лайыҡ. Һуңғыһында яңы төркөм ойоштороу маҡсатында шкафтар, койкалар һатып алынған. Ҡала хакимиәте менән тығыҙ бәйләнеш булдырылған. Кескәйҙәр һаны кинәт артып, уларҙы урынлаштырыу буйынса киҫкен проблемалар килеп тыуһа, Сибай педагогия колледжы бинаһы янында балалар баҡсаһы асыу тураһында килешеү төҙөлгән.
Шуныһы ҡыуаныслы: һуңғы йылдарҙа асылған барлыҡ учреждениелар заманса талаптарға яуап бирә, уларҙа бөтә шарттар ҙа булдырылған. Мәҫәлән, “Әкиәт” балалар баҡсаһында кескәйҙәр рәхәтләнеп бассейнда йөҙә, тоҙ шахтаһында һаулығын нығыта, компьютер, альпинистар, сенсор бүлмәләрендә, спорт, бейеү, музыка залдарында бар яҡлап һәләтен үҫтерә, мәктәпкә ентекле әҙерләнә.
Ҡаланың мәктәпкәсә белем биреү учреждениелары бер-береһе менән тығыҙ бәйләнештә эшләй. Йыл һайын үҙ-ара төрлө конкурс, ярыштарҙа ҡатнашып, тәжрибә уртаҡлашалар, спорт фестивале, театр конкурсы үткәреү матур йолаға әүерелгән. Быйыл кескәйҙәр ҡала уҡыусылары менән бер рәттән “Урал батыр” эпосын яттан һөйләүселәр конкурсында ҡатнашып, оҫталығы менән өлкән апай-ағайҙарын хайран ҡалдырҙы. Май айында ата-әсәләр, тәрбиәселәр менән бергә йылды йомғаҡлау сараһы үтә, унда башҡарылған эшкә йомғаҡ яһала, иң яҡшылар тәбрикләнә.
Мөмкинлектәре сиклән­гән­дәр­гә “Әкиәт” балалар баҡсаһында бөтә уңайлыҡтар булдырылған. Шуны ла билдәләп китергә кәрәк: I класҡа барасаҡ кескәйҙәрҙең йәйге ялын ойоштороу маҡсатында “Юлдаш”, “Шифа” ял лагерҙарында, “Сибай” шифахана-профилакторийында махсус сменалар ойошторола. Уларҙа инвалид балалар өсөн айырым төркөмдәр булдырыла.
“Аҡбуҙат” башҡорт балалар баҡсаһы республиканың тәжрибә майҙансығы булып тора. Малай һәм ҡыҙҙарҙа туған телгә, милли йолаларыбыҙға һөйөү тәрбиәләү маҡсатында төбәктең Мәғариф министрлығы менән берлектә унда төрлө конференциялар ойошторола, тәрбиәселәр тарафынан методик ҡулланмалар әҙерләнә. Дөйөм көс менән мәктәпкәсә белем биреү учреждениелары өсөн федераль стандарттар булдырылды.
“Әкиәт” менән “Аленушка” “Рәсәйҙең иң яҡшы 100 балалар баҡсаһы” исемлегенә инде, уларҙың етәкселәре Наталья Фәттәхова менән Сажиҙә Хоҙайбирҙина “Иң яҡшы етәксе” тигән исем алды. Яңы уҡыу йылы алдынан ҙур шатлығыбыҙ менән дә уртаҡлашҡы килә: ҡаланың Көнсығыш биҫтәһендә 180 урынлыҡ “Ҡурай” тип аталған өр-яңы балалар баҡсаһы асыласаҡ. Әле төҙөүселәр һуңғы эштәрҙе башҡара. Яңы йыл алдынан да кескәйҙәрҙе ҙур бүләк көтә – Алтын ҡасабаһындағы балалар баҡсаһы ишектәрен асасаҡ.
Украинанан мәжбүри күсеп килгәндәрҙең өс сабыйы “Аҡһылыу” баҡсаһына урынлаштырылды. Бындай ғаиләләр өсөн өҫтәмә урындар әҙерләнә.