Аш-һыу оҫталарының “Атай һәр яҡ­тан маһир” тигән III асыҡ конкурсы Өфө районының Михайловка ауылында урынлашҡан “Лукоморье” ял паркында булды. “Тамыр” балалар һәм үҫмерҙәр телеканалы ярҙамында “Әсә йөрәге” әсәләр советы төбәк йә­мәғәт ойошмаһы, һаулығы буйынса мөмкинлектәре сикләнгән балалар һәм үҫмерҙәр өсөн реабилитация үҙә­ге менән берлектә ойошторолған бәйгелә биш ғаилә күмерҙә иттән һәм балыҡтан аш-һыу әҙерләү буйынса көс һынашты.
Үҙҙәре менән таныштырғандан һуң, атай-әсәйҙәр, балалар өсөн ҡы­ҙыҡлы ярыштар башланды. Тәүге һы­нау әсәйҙәр өсөн булды: йәш саҡ­­та­рын иҫкә төшөрөп, йылғанан көйәнтәләп һыу ташыны улар. Кем тиҙерәк һәм кемдең биҙрәләре тулыраҡ була – шул еңеүсе! Ауыл ерендә йәшәгән әсәйҙәр менән бер рәттән, ҡала­ны­ҡылар ҙа һынауҙы уңыш­лы үтте. Был ваҡыт эсендә атайҙар ут яғып, беше­ренеү өсөн кәрәк-яраҡ әҙерләне. Өҫ­тән ямғыр ҡойоп тороуға ҡарамаҫтан, усаҡтар дөрләп янды. Әйтерһең дә, улар ошо ғаиләләрҙә тантана иткән берҙәмлекте, татыулыҡты, көстө кәү­ҙәләндерҙе.
Артабан балалар төрлө йәшелсә-емештән композициялар эшләне. Улар араһында Ерәнкәй исемле бы­ҙау ҙа, күгәрсен дә, күбәләк тә, хатта һыу эйәһе лә булды. Бына майҙанға атайҙар сыҡты. Картуф әрсеү ябай ғына эш тимә, ҡабығын йоҡа һәм мөмкин тиклем оҙонораҡ итергә кә­рәк. Был бәйгелә ғаилә башлыҡ­тары һынатманы, хәйер, әрмеләге тәжрибә лә ярҙам иткәндер.
Конкурста ҡатнашыусыларҙы арыт­тырмаҫ, уларға өҫтәл әҙерләргә ва­ҡыт бирер өсөн ярыштар музыкаль сығыштар менән үрелеп барҙы. Йәш, өмөтлө ҡурайсы Илмир Ҡоҙабаев “Лу­коморье” буйын ҡурай моңона сор­наһа, Сәйҙә Ильясова, Айгөл Ибраһимова, Ләйсән Йәнбирҙина, Со­фия Арутюнян байрам ҡунаҡтарын матур йырҙары менән ҡыуандырҙы. Гөлдәр Ибраһимованың “Һыуһылыу” бейеүе берәүҙе лә битараф ҡалдыр­мағандыр: ҡыҙҙың, оҙон толомдарын һүтеп, ямғыр тамсылары аҫтында талғын ғына йөҙөүе беҙҙе һыу аҫты батшалығына алып төштө лә сихри матурлыҡҡа күмде.
Жюри ағзалары ла баһа биреп ке­нә ултырманы, үҙҙәре лә ярыштарҙа ҡатнашты. “Әсә йөрәге” төбәк йәмәғәт ойошмаһы рәйесе, конкурс директоры Гөлшат Ибраһимова, “Тамыр” балалар һәм үҫмерҙәр телеканалы директоры Гөлназ Ҡолһарина, И. Дунаевский исемендәге Мәҙәни программалар фондының арт-директоры Артур Нәзиуллин, И. Харисова исе­мен­дәге “Мәрхәмәтлек” хәйриә фон­ды директоры Нәзир Хафизов, “До­мовенок” ғаилә кафелары селтәре директоры Римма Еникеева, “Лукоморье” ял паркының производство етәксеһе Дмитрий Чижидов аш-һыуға бәйле викторина һорауҙарына яуап бирҙе. Шулай итеп, ерҙә дөгө яр­ма­һының 15 меңдән ашыу сорты бар­лығын белдек.
Ниһайәт, атайҙар бешергән ризыҡ­ҡа баһа бирергә лә ваҡыт етте. Кү­ңелле музыка, бейеп торған ямғыр аҫтында әҙерләнгән ашамлыҡтар ара­һында нимә генә юҡ: ҡарағат соусына мансылған ит, ыҫланған балыҡ, йә­йен һәм һөмбаш итенән шашлыҡ, маринадланған кальмар, фаршлан­ған помидор, креветкалар... Бына ҡайҙа йыйылған икән аш-һыу оҫта­лары!
Ә шулай ҙа, бәйге булғас, еңеүсе­һен дә билдәләргә кәрәк. Өфө ҡала­һынан Бабиндар ғаиләһе тамашасы һөйөүен яулаһа, уларҙың яҡташтары – “Ут-ҡош” командаһы булараҡ сы­ғыш яһаған Никифоровтар өсөнсө урынға лайыҡ булды. Бәләбәй ҡала­һынан килгән, үҙҙәрен “Күбәләктәр” тип таныштырған Кәримовтар икенсе баҫҡысҡа күтәрелде. Өфөләр быйыл айырыуса әүҙем булды: “Диңгеҙ юл­баҫарҙары” – үҙенсәлекле, сағыу Чер­ниговтар ғаиләһе – хаҡлы рәүеш­тә беренсе урынды алды. Ә инде Белорет яғынан килгән Ғәлиәх­мә­то­втарға етеүсе булманы – өсөнсө тапҡыр үткәрелгән конкурстың абсолют еңеү­сеһе булдылар. Афарин! Һәр ғаиләгә иҫтәлекле бүләктәр һәм “Техно” магазинының бүләк сертификаттары тапшырылды.
Байрамда, йырҙа йырланғанса, “зәңгәр вертолетта тылсымсы осоп килеп”, һәр кемгә туңдырма, емеш-еләк таратты. Татлы бүләккә балалар ғына түгел, өлкәндәр ҙә ҡыуанды. Әйткәндәй, көн дауамында теләгән һәр кеше ҡайнар сәй, былау, шашлыҡ менән һыйланды.
Ғаиләлә һаулығы буйынса мөм­кин­леге сикләнгән бала тәрбиәләү – атай-әсәй өсөн оло һынау. Әммә улар бирешмәҫкә, тормошто дауам итергә, улай ғына ла түгел, яҙмыштарына риза булып йәшәргә көс таба. Тик ҡайһы саҡта өлкәндәр, йышыраҡ ғаилә башлыҡтары, бындай ауыр­лыҡтан ҡотолорға теләп, яҡындарын ташлап китә. Күҙгә күренмәһә лә, йөрәк ярып сыҡҡан бала күңелдән китмәй – сабыйын ҡалдырғандар ғүмер буйы ғазапланып йәшәйҙер ул. Әлеге конкурс ғаилә ҡиммәттәрен нығытыу, бындай балалар тәрбиә­ләгән атай-әсәйгә әхлаҡи ярҙам күр­һәтеү, уларҙы үҙ-ара таныштырыу, берләштереү маҡсатында ойошторолдо. Сарала ҡатнашҡан ғаиләләр­ҙең татыулығына, батырлығына, үҙ-ара дуҫ булыуына ҡарап, башҡалар ҙа өлгө алыр тип ышанғы килә.