Муниципаль район хакимиәтенең физкультура, спорт һәм туризм комитеты рәйесе Ринат Килдебай улы Мортаев иһә уҙған йыл йомғаҡтары буйынса “Иң яҡшы муниципаль хеҙмәткәр” номинацияһында еңеү яуланы.
— Районда спорт һөйөүселәр һаны йылдан-йыл арта, бигерәк тә мәктәптәрҙә был йүнәлештә эш яҡшы ойошторолған, – тине ул. – Бөгөн беҙҙә спорттың 25 төрө әүҙем үҫтерелә. Һәр мәктәптә спорт залы бар, төрлө секция, түңәрәктәр эшләй. Һуңғы ваҡытта хоккейға иғтибар артты, быйыл районда биш хоккей майҙансығы булдырылды. Тренерҙар һәм, уйын тәжрибәһе етешмәүгә ҡарамаҫтан, хоккейсыларыбыҙ Белорет, Әбйәлил, Бөрйән райондарында көстәрен һынап ҡараны, киләһе миҙгелгә дәртләнеп, сәмләнеп әҙерләнә. Быйылғыһы тотошлайы менән Сочиҙағы XXII Ҡышҡы Олимпия уйындарына бағышланды. Район хакимиәте һәм төрлө бағыусылар ярҙамында спортсыларыбыҙҙы республика буйынса ғына түгел, ә сит өлкә, төбәк-ара ярыштарға алып сығабыҙ. Иң мөһиме – беҙҙекеләр һәр саҡ еңеү менән ҡайта. Еңел атлетика буйынса Рәсәй чемпионы Наташа Данилова, Башҡортостан чемпионы Эмиль Юламанов, Илгиз Күсәков менән хаҡлы рәүештә ғорурланабыҙ.
Шулай уҡ төбәктә урыҫ лаптаһы һәм милли көрәштең ныҡлы урын алыуын билдәләргә кәрәк. Йыл һайын Хәйбулланың бил бирмәҫ батырҙары республика бәйгеһендә абсолют чемпион титулын яулай. Танылған көрәш­селәр Ғәззәли Үтәшев, Венер Исҡужин исемендәге ярыштар даими үтеп тора.
Бигерәк тә Аҡъярҙың 1-се, Бүребайҙың 2-се, Подольск, Өфө мәктәбе спорт һөйөү­селәре төрлө ярыштарҙа гел призлы урын ала. Шулай уҡ волейбол буйынса ветерандар командаһы, Ҡаҙағстандың Аҡтүбә районы командаһы менән ярышып, еңеүсе исемен яулаған. Хәйбулла спортсылары шулай уҡ күрше ырымбурҙар менән дә көс һынаша. Ғөмүмән, районда был йүнәлештә эштәр көйлө бара.