Бәйгенең төп бурысы — иң яҡшы проекттарҙы эҙләү, шулай уҡ муниципаль кимәлдәге йүнселлек мөхитен үҫтереүҙең уңышлы тәжрибә өлгөләрен һайлап алыу.
Стратегик башланғыстар агентлығы еңеүселәрҙе өс номинацияла билдәләйәсәк. “Уңышҡа юл” йүнәлеше буйынса — юғары етештереүсәнле эш урындары булдырыуға, инвестицияларҙың һөҙөмтәлелегенә ҡағылған, “Юғары пилотаж” номинацияһында — алдынғы донъя стандарттарына ярашлы, сәнәғәттең яңы тармаҡтары өсөн һөнәри кадрҙар әҙерләүенә, ә “Файҙалы эш-ғәмәл өсөн” номинацияһында социаль өлкәлә эшҡыуарҙарҙың хеҙмәт күрһәтеүенә арналған проект билдәләнәсәк.
Башҡортостан Хөкүмәтендә белдереүҙәренсә, бәйгенең төбәк этаптарында еңеүселәрҙе асыҡлау өсөн һәр федераль округта конкурс комиссиялары төҙөлә. Башҡортостандан комиссияға республика Хөкүмәте Премьер-министры урынбаҫары, иҡтисади үҫеш министры Евгений Маврин саҡырылды.
Проекты премия талаптарына яуап биргән һәр эшҡыуар бәйгелә ҡатнашыуға теләк белдерә ала. Бының өсөн премиябизнесуспех.рф сайтында теркәлеү шарт. Проекттар округ һәм федераль кимәлдә һайлап алына. Еңеүселәр киләһе йылдың февралендә Мәскәүҙә премияны тапшырыу тантанаһында иғлан ителәсәк.