Тағы бер мәсьәлә. Ырымбур өлкәһенең Иҫке Ҡуян ауылында, йәғни арҙаҡлы шәхесебеҙ Мөхәмәтша Буранғоловтың тыуған ауылында мәктәп ябыласаҡ, тигән хәбәр ер-һыуы, халҡы өсөн битараф булмаған һәр кемде борсоуға һалғандыр. Эйе, бөгөн — мәктәп ябылһа, иртәгә ауыл бөтәсәк.
Табыш алыуға бәйле бер-ике генә миҫал килтерәм. Перуға барған сәйәхәтселәргә тауҙың ышыҡ ерен төйәк иткән кондор ҡошоноң тик иртәнге сәғәт 4-5 араһында ғына ояһынан осоп сығып тамаҡланыуы, ә тәүлектең башҡа ваҡытында ҡояш нурынан ҡасып, ояһында үткәреүен һөйләйҙәр һәм таң һарыһында шул ҡошто күрһәтергә алып баралар. Бөркөт ғаиләһенә ҡараған был ҡыйғыр ҡошто яҡындан түгел, бер километр тирәһе йыраҡлыҡтан ғына күҙәтәһең. Шул сихри мәл өсөн һәр турист 10 евро (яҡынса 460 һум тирәһе) аҡса түләй.
Италияның баш ҡалаһы Римдың уртаһында бик матур Треви фонтаны бар. Һыуға көмөш аҡса ырғытһаң, шунда тағы килеү мөмкинлеге тыуа тигән йолаға таянып, сәйәхәтселәр, теләк теләп, иңбашы аша һыуға аҡса ташлай. Ошо ысул менән Тревиҙа йыл буйына йыйылған аҡса яҡынса 900 мең евро (яҡынса 42 миллион һум) тәшкил итеп, ҡала ҡаҙнаһына күсерелә.
Әүәлерәк Истанбулда һыуға ҡытлыҡ була ҡалһа тип, бер бинаның таш баҙына һыу тултырып ҡуйғандар. Төркиәгә килгән туристарҙы шуны күрһәтергә алып баралар. Хаҡы – 10 доллар (350 һум).
Бына бит нисек аҡса һуға йүнсел әҙәмдәр! Ә Мөхәмәтша Буранғолов, Исмәғил Тасимов, Миңлеәхмәт Моталовтың ил алдында күрһәткән хеҙмәтен күләгәлә боҫоп ятҡан ҡошто, һыулы баҙҙы, йәиһә фонтан урғылыуын күҙәтеү менән сағыштырып булмай ҙа баһа!? Фәһем алыр тарихыбыҙ,үрнәк булыр шәхестәребеҙ, бай рухи мираҫыбыҙ онотолмаһын ине.