2013 йылда ошо программаға ярашлы, Куйбышев, М. Гәрәев исемендәге ху­жалыҡтарға, «Мир» кооперативы, «Үҙәк МТС», «Илеш-Агро» йәмғиәттәренә лә 137,2 миллион һум бирелде. Быйыл «Урал», «Сөн», «Илеш», «XXII партсъезд» хужа­лыҡ­тары был эште дауам итә. Әлеге ваҡытта программа нигеҙендә 10 хужалыҡта ремонт эше бара, киләсәккә лә ниәттәре ҙур. Шулай уҡ район хакимиәте лә ситтә тороп ҡалмай, уларҙың мөһим эшен тағы ла киңәйтеү өсөн һәр береһенә 250 мең һум күләмендә финанс ярҙамы күрһәтте.
Үрге Сереккүл ауылында урынлашҡан Куйбышев исемендәге кооперативтың һөтсөлөк фермаһына инәбеҙ. Уның юлына ла, ихатаһына ла асфальт түшәлгән. Ферма янында урынлашҡан сенаж һәм силос соҡоронда ҡышлыҡ мал аҙығы әҙерләп ҡуйылған. Һауын ваҡыты еткәс, аппараттар эшкә ҡушыла. Аҙбарҙы таҙар­тырға кәрәкһә, транспортер төймәһенә баҫаһың. Мал утлығында аҙыҡ бөтә тип хафаланаһы юҡ, трактор уны бер нисә минутта таратып сыға. Һөт махсус бүлмәгә торба буйлап аға. Фермала профилакторий, ашхана, кейем алмаштырыу һәм ял итеү бүлмәһе бар.
— Бында 450 баш һауын һыйырына иҫәпләнгән бина, быҙаулатыу һәм быҙау торлағына капиталь ремонт үткәрелде. Шулай уҡ сенаж, силос соҡоро төҙөлдө. Быйыл Түбән Сереккүл фермаһы ла программала ҡатнашып, әлеге көндә ремонт-монтаж эштәрен алып бара. Айырым торған ике бинаны һауын залы то­таш­тырған. Малдарҙың йәйләү осоро уңышлы бара. Барлығы 1800 баш мал көтөлә. Уларҙы һигеҙ һауынсы-оператор хеҙмәт­ләндерә. Тәүлегенә 9 тонна һөт етеш­терелә. Августа тоҡомсолоҡ хужалығы статусын аласаҡбыҙ, уның өсөн субсидия биреләсәк, — ти йәш етәксе Вадим Авзалов.
Әйткәндәй, былтыр «Баҫыу көнө» республика семинар-кәңәшмәһендә «500 һөтсөлөк ферма­һы» программаһына индерелгән Үрге Се­реккүл фермаһы хеҙмәтенә Президент Рөстәм Хәмитов ыңғай баһа бирҙе.
Илеш районы Хөкүмәт тарафынан би­релгән мөмкинлекте ҡулдан ысҡын­дыр­маҫҡа тырыша. Яҡшы фермаларҙа тейешле продукция етештерергә була. Бының ике яҡлап та файҙаһы ҙур: берҙән, аҙыҡ-түлек етештереү артасаҡ, икенсе яҡтан, крәҫтиән ҙурыраҡ хужалыҡта эшләргә өйрәнә.
Малсылыҡ тармағын техник яҡтан тәь­мин итеүҙең әһәмиәте ҙур. Колхоз эше һиҙе­лерлек еңеләйә. Малсы һәм һа­уын­сылар хәҙер теҙҙән батҡаҡ кисеп йөрөмәй, өйөнә арып-талсығып ҡайтып йығылмай. Шулай булғас, үҙ хужалығында ла эшләргә көсө, ваҡыты ҡаласаҡ...