Хәйбулла районының бөгөнгө социаль-иҡтисади үҫешен “Бүребай тау-байыҡтырыу комбинаты” ябыҡ ак­ци­онерҙар йәмғиәтенән башҡа күҙ алдына килтереп булмай. Төбәктең сәнәғәт флагманы булған был пред­приятиеның үҙенең йолалары бар, улар иҡтисади күрһәткестәре һәм ҡаҙаныштары менән хаҡлы рәүештә ғорурлана ала.
Яңыраҡ Бүребай таусылары өсөн күптән көтөлгән ҡыуаныслы ваҡиға булды: ниһайәт, улар 220 метр алыҫлыҡтағы вентиляция квершлагын “Көньяҡ” шахта үҙәгенә тоташтырҙы. Был юл яңы мәғдән ятҡылығын вентиляция, йәғни саф һауа менән тәьмин итәсәк.
Комбинаттың генераль директоры Рөстәм Аблаев әйтеүенсә, эш 2008 йылда башланып, һуңғы ике йылда тотҡарлыҡһыҙ дауам ителгән. Планға ярашлы, “Көньяҡ” шахта үҙәгенең сәнәғәт майҙансыҡтары объекттарын файҙаланыуға тапшырыу, ер өҫтөндәгеләрен төҙөү быйыл тамамланһа, тау-ҡаҙылма байлыҡ сығарыу урындарында шахтерҙар телендәге “проходка” эшен алып барыу 2016 йылға тиклем ҡаралған. Барлыҡ эш “Октябрь” ер аҫты руднигы начальнигы В.М. Рәхмәтов етәкселегендә тау-капиталь эштәре участкаһы хеҙмәткәрҙәре көсө менән атҡарыла.
Бөгөн бында Сибайҙың “Газпром” йәмғиәте эшселәре тарафынан 2 300 метр араға газ торбалары һуҙыла. Комбинаттың үҙ көсө менән 655 метр арауыҡта һыу торбалары һәм 1000 метр оҙонлоҡта янғынға ҡаршы торбалар һалына, шулай уҡ хужалыҡ-көнкүреш өсөн канализация эштәре лә башҡарыла.
Шуныһы иғтибарға лайыҡ: Бүребай тау-байыҡтырыу комбинаты ҡасаба, шулай уҡ тотош район инфраструк­тураһына, уның социаль үҫешенә һиҙелерлек йоғонто яһай. Предприятие хеҙмәткәрҙәре аҙна һайын Бүребай ауылы урамдарына экологик өмәләргә сыға, ветерандарға ярҙам күрһәтә. Ҡасабалағы бер генә сара ла комбинат ярҙамынан тыш үтмәй.
Рөстәм Аблаев билдәләүенсә, металлургия тармағында үҙ эшенә бирелгән кешеләр генә йыйылған, сөнки был һөнәр яуаплылыҡ ҡына түгел, ғөмүмән, иң көслө сифаттарҙы талап итә. Сынығыу, һәр саҡ маҡсатҡа ынтылыш Бүребай металлургтарына барлыҡ ауырлыҡтарҙы еңеп сығырға ярҙам итә лә инде.
Комбинат эшселәрен һөнәри байрамдары менән ҡотлап, тағы ла юғарыраҡ ҡаҙаныштарға өлгәшеү­ҙәрен, предприятиеның киләсәктә лә төбәктә иң ҡеүәтле сәнәғәт флагманы булып ҡалыуын теләйбеҙ.