“Берҙәм Рәсәй” партияһы рәйесе Дмитрий Медведевтың Башҡортостандағы йәмәғәт башланғысында ҡабул итеү бүлмә­һендә үткән матбуғат конференцияһында торлаҡ-коммуналь хужалыҡ һәм тарифтар үҫеүенә арналған мәсьәләләр тикшерелде. Сарала Рәсәй Дәүләт Думаһының Торлаҡ сәйәсәте һәм торлаҡ-коммуналь хужалыҡ буйынса комитеты рәйесе урын­баҫары Павел Качкаев, Башҡортостандың Дәүләт Йыйылышы — Ҡоролтай депутаты Елена Родина, Төбәк йәмәғәт ҡабул итеү бүлмәһе етәк­се­һе Раил Әсәҙуллин, ведомство һәм министр­лыҡтар вәкилдәре ҡатнашты.
Павел Качкаев билдәләүенсә, Рәсәй Хөкүмәте һуңғы йыл­дар­ҙа торлаҡ-коммуналь хужалыҡ өлкәһендә бер нисә өҫтөн­лөклө йүнәлеште билдәләне. Тәү сиратта был торлаҡты си­­- фат­лы хеҙмәтләндереү һәм идара итеүсе компанияларҙың эшенә, йылылыҡ селтәре инфраструктураһын яңыртыуға, тор­лаҡ-коммуналь хужалыҡҡа инвесторҙар йәлеп итеүгә бәйле.
— Торлаҡ-коммуналь хужалыҡ хеҙмәтенең йыллыҡ күләме 4 триллион һум тирәһе, ә был илдең тулайым эске продуктының 6-7 процентын тәшкил итә. Бөгөн иһә Рәсәй халҡы хеҙмәттәр өсөн йылына 1,5 триллион һум түләй. Идара итеүсе компаниялар аша ошондай сығымдар үтә. Уларҙың ни тиклем асыҡ һәм сифатлы эшләүе, әлбиттә, милек эйәһенән тора, — тине Павел Рюрикович.
Артабан ул былтыр декабрҙә Дәүләт Думаһы ҡабул иткән «Рәсәй Федерацияһының Торлаҡ кодексына һәм Рәсәй Феде­рацияһының башҡа айырым закондар сығарыу акттарына үҙгәрештәр индереү тураһында»ғы Федераль закон тураһында һөйләне, уның ҡайһы бер үҙенсәлектәренә туҡталды. Бынан тыш, Дәүләт Думаһы беренсе уҡыуҙа идара итеүсе компания­ларҙы лицензиялау тураһында закон проектын хуплаған. Әгәр ул ҡабул ителһә, үҙ эшен еренә еткереп эшләмәгән компания артабан эшмәкәрлеген туҡтатырға мәжбүр буласаҡ.
Башҡортостандың Тарифтар буйынса дәүләт комитеты рәйесе Фәдис Сәлимгәрәевтән сарала ҡатнашҡан хәбәрселәр торлаҡ-коммуналь хужалыҡ хеҙмәттәре өсөн 1 июлдән артҡан хаҡтар тураһында һорамай булдыра алманы. Май башында Рәсәй Хөкүмәте 2014 йылдың 1 июленән 2018 йылға тиклем һәр төбәктә халыҡтың торлаҡ-коммуналь хеҙмәттәр өсөн түләү индексын раҫланы. Башҡортостанда был күрһәткес 6 проценттан артмаҫҡа тейеш. Ләкин республиканың һигеҙ ҡалаһында, йәғни Стәрлетамаҡ, Благовещен, Салауат, Ағиҙел, Нефтекама, Сибай, Ишембайҙа тарифтар ике тапҡырға артты, һыу һәм йылылыҡ менән тәьмин итеүсе ойошмаларҙың сығымдарын хаҡҡа индереү бының төп сәбәбе булып тора, тип аңлатты Фәдис Фәүҡәт улы.
Торлаҡ-коммуналь түләүҙәр кеҫәгә ныҡ һуҡмаһын өсөн белгестәр халыҡҡа адреслы социаль түләү алырға кәңәш итә.