Ырымбур өлкәһе делегацияһын Сибай институты директоры Зиннур Йәрмөхәмәтов бик йылы ҡабул итте. Тәүҙә ҡунаҡтарға институтта экскурсия ойошторолдо, улар белем йортонда уҡыу барышын, матди-техник базаны ҡараны, студенттар менән аралашты. Артабан фекер алышыу “түңәрәк өҫтәл”дә дауам итте — ике яҡ өсөн дә файҙалы һөйләшеү ойошторолдо.
Зиннур Ғөбәйҙулла улы институтта белем биреү эшмәкәрлеге ме­нән таныштырҙы, уҡыу һәм көнкүреш шарттары хаҡында һөйләне. Ут күршеләрҙең институтта уҡырға теләүен хупланы, бындай дуҫлыҡ ептәренең Силәбе өлкәһе менән күптән булдырылыуын билдә­ләне.
Ырымбур башҡорттары ҡорол­та­йының башҡарма комитеты вәкиле, Башҡортостандың атҡаҙанған мә­ҙә­ниәт хеҙмәткәре Миңзирә Аҡҡошова, ситтә йәшәгән милләттәштәребеҙҙе милли рухта тәрбиәләү маҡсатында йәштәргә тап Сибай ерендә белем алыу зарурлығын билдәләне, сөнки институт студенттарҙы илһөйәрлек рухында, күренекле шәхестәребеҙ өлгөһөндә тәрбиәләүгә етди иғтибар бүлә. Һәр көн уларҙы башҡорт хал­ҡының бөйөк һүҙ оҫталары Шә­йехзада Бабич, Һәҙиә Дәү­ләт­шина, Зәйнәб Биишева, Мөхәмәтша Бу­ранғолов, мәшһүр халыҡ йыры “Си­бай”ҙың авторы, күренекле дәүләт эшмәкәре Сибай Шәйәхмәтов бюс­тары ҡаршы ала.
Йәш быуынға эстетик тәрбиә биреү маҡсатында уҡыу йорто ко­ридорҙары Әхмәт Лотфуллин, Борис Домашников, Әҙиә Ситдиҡова кеүек күре­некле һәм урындағы һәүәҫкәр рәссамдарҙың картиналары, хал­ҡы­быҙҙың үлемһеҙ “Урал батыр” ҡобайыры, “Сыңрау торна”, “Ете ҡыҙ” легенда-риүәйәттәре буйынса эш­ләнгән репродукциялар, паннолар менән биҙәлгән.
Алдағы уҡыу йылынан Сибай институтына Ырымбур өлкәһе йәштәренең уҡырға килергә теләүе хуплауға лайыҡ. Фекер алышыуҙа йыл һайын уҡыу йорто ойошторған “Асыҡ ишек”­тәр көнөндә, сығарылыш класс уҡыу­сылары өсөн олимпиа­да­ларҙа ҡат­нашыу мәсьәләһе күтәрел­де. Киләсәктә Сибай институты де­легацияһының Ырымбур өлкә­һендәге башҡорттар күпләп йәшәгән ауылдарҙа милләт­тәштәр менән осрашыуҙар, уҡыусылар менән яҡын­дан танышыу саралары ойоштороуы ла күҙ уңында тотола.
Ырымбур — Сибай дуҫлығына яңы күпер һалынды. Киләсәктә улар араһында рухи һәм мәҙәни бәйләнеш ныҡлы дауам итер, хеҙмәттәшлекте нығытыуға йүнәл­телгән осрашыуҙар тағы ла булыр тигән ышаныс менән таралышты барыһы ла.