Абдрахман эшкә бик иртә китер ҙә кисен һуң, арып-талсығып, әммә баҫыу эштәренең уңышлы барға­нына ҡыуанып, һәр саҡ ҡәнәғәт булып ҡайтыр ине. Яҙғы баҫыу эштәре тамамланғас, ул ҡатыны Рәбиға менән Малаяҙҙа йәмле Йүрүҙән йылғаһы буйын­дағы аҡлан­да ойошторолған һабантуйға барып ял итергә, күңел асырға ниәтләй. Әммә теләге бойомға ашмай. 22 июндә, йәкшәмбе көнөн­дә, радио аша һуғыш башланғаны тураһында хәбәр итәләр. Иртәгәһенә үк Абдрахман Ғәйфуллин, район хәрби комиссариатына килеп, фронтҡа ебәреүҙәрен һорай. Үтенесен ҡәнәғәтләндерәләр. Китеү көнө 8 июлгә билдәләнә, шуға тиклем МТС-та эштәрен бөтөрөп, урынына иң ышаныслы кешене ҡалдыра.
Ғәйфуллин хужалыҡ эштәре часында хеҙмәт итә башлай, ләкин күңеле һәр саҡ яу ҡырына, дошманға ҡаршы алышҡа ынтыла. Фронтҡа ебәреүҙәрен һорап әллә күпме рапорт яҙа ул...
1944 йыл. Һуғыштың иң ҡыҙған, көсөр­гәнешле мәле. Ҡыҙыл Армия, бөтә Совет ерен дошман илбаҫар­ҙарынан таҙартып, фашизм ҡолло­ғонан азат итеү өсөн Европа ха­лыҡ­тарына ярҙамға килә. Ғәй­фул­лин хеҙмәт иткән часть яугирҙәре һуғыша-һуғыша Польшаға керә һәм уны азат итә.
Польшаны азат иткәндә күрһәткән батыр­лығы, ҡыйыулығы өсөн уға Советтар Союзы Геройы исеме бирелә. Был хәл 1945 йылдың 17 апрелендә була. Гвардия лейтенанты Абдрахман Ғәйфуллиндың ротаһына, Одер йылғаһы аша сығып, уң яҡ флангы­лағы позицияны яуларға, йылғаны кисеп сығыуҙы тәьмин итергә бойо­роҡ бирелә. Хәрби бурыс уңышлы үтәлә. Һуғышсылар дошман траншеяларын яулай. Ә траншея аръяғында — асыҡ тигеҙлек. Ҡалдырылған позицияларын кире ҡулға төшөрөргә тырышып, дошман һөжүмгә күсә. Гитлерсылар уң флангыны ситләтеп үтергә ынтыла. Дошмандың хәйләһен аңлап, командир уларға ҡаршы ике пулемет менән һөжүмгә күсә. Немецтар ҙур юғалтыуҙарға дусар була, шулай ҙа һөжүм итеүҙәрен дауам итә. Гвардиясылар сафы һирәгәйә, пулеметтар тына. Яугирҙәр ҡамау эсендә ҡала. Был алышта, Бөйөк Еңеүгә 22 көн генә ҡалғас, яҡташыбыҙ Абдрахман Зәйнулла улы батырҙарса һәләк була.
Рәбиға Нафиҡ ҡыҙы иренең һәләк булыуы тураһында хәбәр ала. Унда былай тиелгән:
“Хөрмәтле Рәбиға Нафиҡ ҡыҙы! Юғары Башкомандование һеҙгә шуларҙы белдерә: һеҙҙең ирегеҙ, гвардия лейтенанты Абдрахман Зәйнулла улы Ғәйфуллин, Тыуған иле өсөн һуғышта батырҙарса һәләк булды. Тиңдәшһеҙ алышта күрһәткән ҡаһарман­лығы өсөн ирегеҙ Абдрахман Зәйнулла улы Ғәйфуллинға СССР Юғары Советы Пре­зидиумының Указы менән “Советтар Союзы Геройы” тигән юғары исем бирелде.
СССР Юғары Советы Прези­диумының ирегеҙгә Советтар Союзы Геройы исемен биреү тура­һындағы Указын иҫтәлек итеп һаҡлау өсөн ебәрәбеҙ. Уның ҡаһар­манлығын яҡташтары, ауылдаштары бер ваҡытта ла онот­маһын! СССР Юғары Советы Рәйесе Н. Шкверник”.
Рәбиға Нафиҡ ҡыҙы ғүмеренең һуңғы йылдарында улы Радик менән Өфөлә йәшәне.
Яҡташтары Абдрахман Ғәйфул­лин­дың иҫтәлеген ҡәҙерләп һаҡлай. Бөйөк Еңеүҙең 30 йыллығын билдә­­ләгәндә Арҡауыл ауылында уға һәйкәл ҡуйылды. Шулай уҡ батырҙар аллеяһында ла Геройҙың иҫтәлекле таҡ­таташы бар.