Шулай итеп, иң тәүҙә (29 ғинуар) өс фотоһүрәт баҫылғайны: Дәүләт Йыйылышы – Ҡоролтай бинаһы алдында милли батырыбыҙ Салауат Юлаевҡа ҡуйылған һәйкәл, Туҡай урамындағы Һаулыҡ һаҡлау министрлығы бинаһы һәм Өфө дәүләт авиация техник университеты алдындағы самолет. Дөрөҫ яуаптарҙы иң беренсе Регина Утарбаева (адресы күрһәтелмәгән), Әхмәҙи Ибраһимов (Өфө районының Чесноковка ауылы) һәм Рәмилә Мәхмүтова (Ғафури районының Имәндәш ауылы) ебәрҙе.
4 февралдә баҫылғанында иһә Советтар Союзы Геройы Александр Матросовҡа (Шакирйән Мөхәмәтйәнов) һәйкәлде һәм Федераль почта элемтәһенең Башҡортостан идаралығы бинаһын танығанһығыҙҙыр. Рәзинә Шәрипова (Өфө ҡалаһы) менән Регина Утарбаева барыһынан да өлгөрөрәк булды.
18 февралдә мәшһүр актер Арыҫлан Мөбәрәковҡа һәйкәл менән Өфө дәүләт ҡурсаҡ театры эргәһендәге торлаҡ йорт (халыҡ телендә – “Елкән”) фотоларын тәҡдим иткәйнек, уларға тулы яуап алманыҡ.
19 мартта иһә “Мир” фирмаһы” туҡталышындағы урам һепереүсегә һәйкәл менән Өфө моторҙар эшләү берекмәһе биләмәһендәге самолетты баҫтырғайныҡ – берәүҙән дә яуап килмәне.
12 апрелдә Археология һәм этнография музейын һәм Башҡорт дәүләт академия драма театры алдындағы Мәжит Ғафури һәйкәлен тәҡдим иттек, дөрөҫ яуап биреүсе булманы.
2 майҙа баҫылған фотолар аша Еңеү паркындағы Т-34 танкын, Башҡорт дәүләт педагогия университеты алдындағы М. Аҡмулла һәйкәлен Күмертау ҡалаһынан Фәүзиә Ишкинина таныған.
4 июндә башҡорт генералдары Таһир Кусимовтың һәм Миңлеғәле Шайморатовтың һәйкәлдәрен күрһәттек. Уға Рәзинә Шәрипова (Өфө ҡалаһы), Әхмәҙи Ибраһимов (Өфө районының Чесноковка ауылы) һәм Илеш районынан Илназ Азаматов дөрөҫ яуап биргән.
Шулай итеп, «Өфө зирәктәре» исеменә түбәндәгеләр лайыҡ булды: Регина Утарбаева (беренсе урын), Рәзинә Шәрипова (икенсе урын), Әхмәҙи Ибраһимов (өсөнсө урын). Еңеүселәрҙең барыһын да ихлас күңелдән ҡотлайбыҙ, ғаилә именлеге һәм һаулыҡ теләйбеҙ. Бүләк алыу өсөн 8 (347) 272-96-90 телефонына шылтыратығыҙ.